Aqmola oblysynda Jabaı ózeninen tóngen qaýip seıildi

KÓKShETAÝ. KAZINFORM – Aqmola oblysynyń Atbasar aýdanynda Jabaı ózeninen tóngen qaýip seıildi. Ózendegi sýdyń deńgeıi 3,80 metrge deıin tómendedi.

Aýdan ákimi Amanbek Qaljanovtyń málimetinshe, Jabaı ózenindegi sýdyń qaýipti deńgeıi 4,40 metr bolsa, sý tasqyny kezinde 6,20 metrge deıin kóterilgen. Qazirgi kezde sýdyń deńgeıi birshama túsip, jaǵdaı turaqtalyp keledi.

«Aýdandaǵy áleýmettik nysandardyń barlyǵy shtattyq rejımde jumys istep tur. Sý basqan №1 orta mektepti qalpyna keltirý jumystaryn qolǵa alamyz. Ázirge oqýshylar Atbasar qalasynyń agrarlyq-ındýstrııalyq kolledjinde eki aýysymda oqyp jatyr», - dep túsindirdi aýdan ákimi.

Aıtýynsha, sýdan japa shekken 130-dan astam atbasarlyq 100 aılyq eseptik kórsetkish mólsherinde bir jolǵy kómek alǵan. Qazirgi kezde tańda arnaıy qurylǵan komıssııa turǵyn úıler men múlikke keltirilgen zalaldy eseptep jatyr.

Aımaq basshysy Marat Ahmetjanov Atbasar aýdanynda bolyp, sý tasqynynan japa shekken ǵımarattar men qala kóshelerin qalpyna keltirý jumystaryn shıratýdy tapsyrdy.

«Jergilikti atqarýshy organdardyń jáne turǵyndardyń birlesken kúsh-jigerimen ǵımarattardy qalpyna keltirý jáne kóshelerdi tazartý jumystaryn bastap, jalpyqalalyq senbilik ótkizý kerek», - dedi Marat Ahmetjanov.

Aıta ketsek, budan buryn Aqmola oblysynyń Jaqsy aýdanyna parom ótkeli jetkizilgenin jazǵan edik.