Aqmola oblysynda zardap shekken sharýalarǵa qandaı qoldaý kórsetiledi

Aqmola oblysynda egin jınaý jumystaryn júrgizý úshin dándi jáne maıly daqyldardy keptirýge 90,5 myń tonna kepildendirilgen dızel otyny jáne 20 myń tonna suıytylǵan gaz bólindi. Bul týraly oblystyq máslıhattyń agrarlyq máseleler jáne ındýstrııalyq - ınnovatsııalyq damý jónindegi turaqty komıssııanyń otyrysynda Aýyl sharýashylyǵy jáne jer qatynastary basqarmasy basshysynyń orynbasary Erkesh Álenov málim etti, dep habarlaıdy Kazinform. 

Oblystyq máslıhattyń baspasóz qyzmetiniń málimetinshe, osy jyldyń toǵyz aıyndaǵy aýyl sharýashylyǵy jáne jer qatynastary basqarmasynyń jumys qorytyndylary týraly aqparatty depýtat Saıat Syzdyqovtyń tóraǵalyǵymen agrarlyq máseleler jáne ındýstrııalyq-ınnovatsııalyq damý jónindegi turaqty komıssııanyń músheleri tyńdady.

Jıynda oblystyq Aýyl sharýashylyǵy jáne jer qatynastary basqarmasy basshysynyń orynbasary Erkesh Álenov sharýalarǵa kórsetilip otyrǵan qoldaý týraly aıtty.

«Bıylǵy egis naýqany sapaly tuqymdardy paıdalana otyryp, ońtaıly merzimde ótkizildi. Tyńaıtqyshtar engizý, ósimdikterdi aramshópterden qorǵaý, egistikterdi óńdeý boıynsha agrotehnıkalyq is-sharalardyń tolyq kesheni ótkizildi. Alaıda qolaısyz tabıǵı-klımattyq jaǵdaılar, normadan 2 ese tómen jaýyn-shashyn, búkil vegetatsııalyq kezeńde óte joǵary temperatýra dándi daqyldardyń ónimdiliginiń tómendeýine aıtarlyqtaı áser etti. Tamyzdyń úshinshi onkúndiginde bastalǵan uzaqqa sozylǵan jańbyr astyqtyń sapasyn nasharlatyp, onyń jappaı kóktep ketýine ákeldi. Aýa raıynyń jaısyzdyǵy egin jınaý jumystarynyń qarqynyna da áser etti», – dedi Erkesh Álenov.

Ol atap ótkendeı, oblysta jáne ár aýdanda máselelerdi jedel sheshý jáne agrarshylardy qoldaý úshin jumys toptary quryldy. Olardyń quramyna jaýapty qyzmetterdiń, quqyq qorǵaý organdarynyń, qarjy ınstıtýttarynyń ókilderi, sondaı-aq máslıhat depýtattary kirdi.

«Jalpy, osy jyldyń 5 qazanyndaǵy jaǵdaı boıynsha 3,5 mln ga nemese 71 paıyz alqapta dándi daqyldar bastyryldy. Astyqtyń saqtalýyn qamtamasyz etý maqsatynda ortasha ónimdiligi 5,7 ts/ga bolǵan kezde 2 mln tonna jınaldy. Ony qabyldaýdy oblystyń jalpy saqtaý syıymdylyǵy 4,8 mln tonna bolatyn 72 astyq qabyldaý kásiporyndary júzege asyrady. Aýyl sharýashylyǵy qurylymdarynda kólemi 2,4 mln tonna astyq qoımalary bar. Egin jınaý jumystaryn júrgizý úshin 1 lıtrge 250 teńge baǵamen 90,5 myń tonna kepildendirilgen dızel otyny bólindi. Dándi jáne maıly daqyldardy keptirýge 20 myń tonna suıytylǵan gaz bólindi. Prezıdenttiń tapsyrmasyn oryndaý úshin oblystyń zardap shekken fermerlerine qarjylyq jáne ózge de qoldaý kórsetiletin bolady», – dep tolyqtyrdy basqarma basshysynyń orynbasary.

Sonymen birge, jıynda mal sharýashylyǵyn damytý, jeńildetilgen kredıt berý arqyly aýyl halqynyń tabysyn arttyrýǵa baǵyttalǵan «Aýyl Amanaty» baǵdarlamasyn iske asyrý jáne jaıylym tapshylyǵy máselesi de sóz boldy.

Aıta ketsek, budan buryn Aqmola oblysynda aptap ystyq pen jańbyr astyq shyǵymyna keri áser etkeni týraly jazǵan edik.