Aqmola oblysynda zańsyz jumystan shyǵyp qalǵan tárbıeshiniń quqyǵy qorǵaldy
KÓKShETAÝ. KAZINFORM — Aqmola oblysynda birinshi jáne ekinshi satydaǵy sottar eńbek quqyǵy buzylǵan tárbıeshini qorǵap shyqty. Áıel adam jumysynan keıingi kúnmen zańsyz bosatylǵan edi, dep habarlaıdy Kazinform agenttiginiń tilshisi.
Іstiń mán-jaıyn Aqmola oblystyq sotynyń baspasóz qyzmeti málimdedi.
2023 jyldyń 4 qańtarynda áıel adam bir jyldyq eńbek kelisimshartymen mını-ortalyqqa tárbıeshi bolyp jumysqa qabyldanǵan. 2024 jyldyń qańtarynda jumys berýshi oǵan kelisimshartty uzartý nemese toqtatý týraly eshteńe aıtpaǵan, sol sebepti tárbıeshi jumysyn jalǵastyra bergen.
Áıel bir jyl boıy alańsyz jumys istep júrgende, 2024 jyldyń jeltoqsanynda oǵan 2024 jylǵy 18 qańtardaǵy jumystan bosatý týraly buıryqty kórsetken. 2025 jyldyń qańtarynan bastap ol jumysyn toqtatyp, kóp uzamaı sotqa júgingen. 2024 jylǵy 18 qańtar men 30 jeltoqsandaǵy jumystan bosatý týraly buıryqtardy zańsyz dep taný jáne olardy joıý, tárbıeshi qyzmetine qaıta ornalastyrý, májbúrli túrde jumyssyz júrgen ýaqyty úshin eńbekaqy óndirý jáne moraldyq ótemaqy talap etken.
— Eńbek kodeksine sáıkes, jumys berýshi 2024 jylǵy 4 qańtarda G.-ny eńbek qatynastarynyń toqtatylýy týraly eskertýge mindetti bolǵan, alaıda ol jumysyn jalǵastyrǵan. Osyǵan oraı, kelisimshart merzimsiz dep esepteledi (EK 30-bap). 2024 jylǵy 30 jeltoqsandaǵy jumystan bosatý týraly buıryq zańsyz, sebebi eńbek sharty avtomatty túrde uzartylǵan.
Ujymdyq shartta kelisimshart merzimi aıaqtalǵan soń taraptar ony qosymsha kelisimmen uzarta alatyny kórsetilgen, biraq mundaı kelisim jasalmaǵan. Shartta naqty aıaqtalý merzimi kórsetilmegen. Shart qol qoıylǵan sátten bastap kúshine enedi, alaıda talapker 5 qańtardaǵy shartqa qol qoımaǵan.
Jaýapker shartqa qol qoıýdan bas tartý aktisin usynǵanymen, talapkerdiń shartqa qol qoıý rásimine shaqyrylǵany nemese tıisti túrde habarlanǵany týraly dálel usynbaǵan. Buıryqta eńbek shartyn uzartýdy retteıtin Eńbek kodeksiniń baby kórsetilmegen. 18 qańtardaǵy buıryq talapkerdiń jaǵdaıyn nasharlatady, jaýapker EK 30-babyn jáne ujymdyq sharttyń tarmaǵyn buzǵan, — dep atap ótti sotta anyqtalǵan zańbuzýshylyqtar.
Birinshi saty sotynyń sheshimimen jumystan bosatý týraly buıryqtar zańsyz dep tanylyp, joıyldy. Tárbıeshi óz qyzmetine qaıta ornalastyryldy. Áıeldiń paıdasyna 560 728 teńge kóleminde májbúrli jumyspen qamtylmaǵan ýaqytyna eńbekaqy, 100 myń teńge moraldyq zııan jáne ókil qyzmetiniń shyǵyndary óndirildi.
Oblystyq sot alqasynyń qaýlysymen birinshi saty sotynyń sheshimi ózgerissiz qaldy.
Buǵan deıin 1 shildeden bastap Kókshetaýda jaryq baǵasy ózgeretini habarlanǵan bolatyn.