Aqmola oblysynda zańsyz jumys istep júrgen 440 taksı júrgizýshisi anyqtaldy

ASTANA. KAZINFORM – Zańsyz júrgen barlyq júrgizýshiler ákimshilik jaýapqa tartyldy.

Aqmola oblystyq polıtsııa departamentiniń habarlaýynsha, óńirde arnaıy ruqsat qujattarynsyz adam tasymaldaý jaǵdaılary jıilep barady.

Mysaly, bıylǵy jyldyń 21 tamyzynda «Astana — Petropavl» avtojolynyń 243-shaqyrymynda patrýldik polıtsııa qyzmetkerleri tıisti ruqsat qujattary joq júrgizýshiniń kommertsııalyq tasymalmen aınalysyp júrgenin anyqtady.

— Júrgizýshige qatysty Qazaqstan Respýblıkasynyń Ákimshilik quqyq buzýshylyq týraly kodeksiniń 463-baby boıynsha ákimshilik hattama toltyryldy. Er adamnyń jolaýshylardy tasymaldaýǵa lıtsenzııasy men qajetti ruqsattary bolmasa da, ár jolaýshydan 6 myń teńgeden alǵany anyqtaldy. Mundaı áreketter tek zańbuzýshylyq qana emes, sonymen qatar azamattardyń ómiri men densaýlyǵyna qaýip tóndiredi. Mundaı júrgizýshiler kólik quraldarynyń tehnıkalyq jaı-kúıi men qaýipsizdik talaptaryn elemeıdi, — dep habarlady vedomstvo ókilderi.

Jyl basynan beri Aqmola oblysynda jeke tasymaldaýshylardyń zańsyz qyzmetine qatysty 440 jaǵdaı tirkelgen. Olardyń barlyǵy ákimshilik jaýapqa tartyldy.

Polıtsııa qyzmetkerleri jolaýshylarǵa, ásirese qalaaralyq tasymal kezinde, jolǵa shyqpas buryn júrgizýshiniń lıtsenzııasynyń bar-joǵyn mindetti túrde tekserýge jáne aqsha únemdeımin dep óz bastaryn qaterge tikpeýge keńes berdi.

Osyǵan deıin Aqmola oblysynda jol apatynan eki adam mert bolyp, tórteýi jaraqat alǵany týraly jazdyq.