Aqmola oblysynda zańsyz fıtozerthana anyqtaldy

ASTANA. KAZINFORM – Aqmola oblysynda esirtki qylmysyna qarsy is-qımyl basqarmasynyń jedel qyzmetkerleri Esil aýdandyq polıtsııa bóliminiń qyzmetkerlerimen birlesip, Moskovskoe aýylynda quramynda esirtki bar ósimdikterdi zańsyz ósirýge arnalǵan fıtozerthanany anyqtap, joıdy, – dep habarlaıdy Polisia.kz.

Tintý barysynda qarasora ósirilgen 70-ten astam gúl qumyrasy, sondaı-aq ósimdikterdi sýarý, kútip-baptaý jáne óńdeýge arnalǵan arnaıy jabdyqtar tárkilendi.

Jedel-izdestirý is-sharalary nátıjesinde zańsyz fıtozerthanany uıymdastyrýshy men onyń kómekshisi anyqtaldy. Aldyn ala málimetterge sáıkes, Aqmola oblysy Esil qalasynyń 32 jastaǵy turǵyny óz turǵylyqty jerinen shamamen 50 shaqyrym qashyqtyqta ornalasqan Moskovskoe aýylynda zańsyz óndiristi jabdyqtaǵan. Al zerthana ornalasqan jerde onyń kómekshisi — aýyldyń 42 jastaǵy turǵyny zańsyz bıznesti baqylap otyrǵan kezinde ustaldy.

Tergeý derekterine sáıkes, kúdikti ótken jyldyń sońynda daıyn ónimdi jınap úlgergen, al bıyl jyl basynda jańa ósimdikterdi otyrǵyzǵan. Alaıda polıtsııa qyzmetkerleri zańsyz áreketti der kezinde toqtatty.

Aıta keteıik, buǵan deıin atalǵan azamat quramynda esirtki bar ósimdikterdi zańsyz ósirgeni úshin qylmystyq jaýapkershilikke tartylǵan. Qazirgi ýaqytta atalǵan derek boıynsha qylmystyq is qozǵalyp, oqıǵanyń barlyq mán-jaıyn anyqtaýǵa baǵyttalǵan tergeý sharalary júrgizilip jatyr.

Budan buryn Jetisý oblysynda polıtseıler úıinde fıtozerthana uıymdastyrǵan turǵyndy ustaǵanyn jazǵan edik.

Atyraýda esirtki ósirýge arnalǵan fıtozerthana anyqtaldy.

ShQO-da esirtki ósirýge arnalǵan 4 fıtozerthana joıyldy.