Aqmola oblysynda zań buzǵan avto-gaz quıý stantsııalaryna 1 mln teńge aıyppul salyndy
KÓKShETAÝ. KAZINFORM — Saýda jáne ıntegratsııa mınıstrliginiń Tehnıkalyq retteý jáne metrologııa komıtetiniń Aqmola oblysy boıynsha Departamenti Aqmola oblysynda suıytylǵan gaz satatyn eki sýbektige qatysty jospardan tys tekseris júrgizdi. Bul týraly vedomstvo málim etti.
Jospardan tys tekseris nátıjesinde eki nysanda suıytylǵan gazdy ótkizý kezinde qoldanylatyn tekserýden ótpegen ólsheý quraldaryn paıdalaný túrinde kórinis tapqan zań buzýshylyqtar anyqtaldy. Atalǵan áreketter Qazaqstan Respýblıkasynyń ólshem birligin qamtamasyz etý salasyndaǵy zańnamasynyń talaptaryna qaıshy kelip, tutynýshylardyń quqyqtarynyń buzylý qaýpin týdyrady.
Zań buzýshylyqqa saı jalpy somasy 1 061 640 teńgege ákimshilik aıyppul salyndy.
Tehnıkalyq retteý jáne metrologııa salasyndaǵy memlekettik baqylaýdy júzege asyrý sheńberinde 2024 jyldyń basynan bastap qazirgi ýaqytqa deıin oblys boıynsha avtogaz quıý stantsııalaryna qatysty aýqymdy baqylaý is-sharalarynyń kesheni ótkizildi.
Oblys aýmaǵynda suıytylǵan gazdy ótkizý qyzmetimen aınalysatyn 20-dan astam sýbekt tirkelgen. Barlyǵyna qatysty profılaktıkalyq baqylaý júrgizilip, onyń barysynda barlyq jaǵdaıda zań buzýshylyqtar, sonyń ishinde ólsheý quraldaryn mindetti metrologııalyq tekserýsiz paıdalaný faktileri anyqtaldy. 22 sýbekt profılaktıkalyq baqylaý josparyna engizildi, olardyń nátıjesi boıynsha qoldanystaǵy zańnamaǵa sáıkes tıisti áreket etý sharalary qabyldandy.
• 14 kásipkerlik sýbektisine uıǵarym shyǵaryldy,
• 84 birlik tekserilmegen jabdyqty paıdalanýǵa tyıym salyndy,
• QR ÁQBtK 462-baby boıynsha ákimshilik is qozǵaldy.
Memlekettik organ ókilderi atap ótkendeı, ótkiziletin is -sharanyń negizgi maqsaty — zańnama men tutynýshy quqyǵynyń saqtalýyn qamtamasyz etý. Ólsheýdiń senimsiz quraldaryn paıdalanýǵa jol berilmeıdi, óıtkeni ol azamattardyń senimine nuqsan keltiredi jáne esepteýlerdiń ashyqtyq qaǵıdattaryn buzady.
Departament tekserilmegen ólsheý quraldaryn qoldaný zańnamany buzý jáne tutynýshylardyń quqyqtaryna nuqsan keltiretinin eske salady. Mundaı buzýshylyqtardy anyqtaǵan jaǵdaıda Azamattarǵa aýmaqtyq Tehnıkalyq retteý jáne metrologııa organdaryna júginýdi usynady.
Aıta keteıik, suıytylǵan gazdy Qazaqstan aýmaǵynan áketýge tyıym salý uzartylǵan.