Aqmola oblysynda Ulttyq joba aıasynda 340 shaqyrym elektr jelisi jańartylmaq
ASTANA.KAZINFORM — Aqmola oblysynda elektrmen qamtý júıesi túbegeıli jańǵyrady.
«Energetıkalyq jáne kommýnaldyq sektorlardy jańǵyrtý» Ulttyq jobasy aıasynda Aqmola elektrjelilik úlestirý kompanııasy bıyl shamamen 340 shaqyrym jelini, alty qosalqy stantsııany jáne 44 transformatorlyq kishi stantsııany jańartady. Endi jańǵyrtý jumystarynyń naqty qandaı nátıje beretinin jáne turǵyndarǵa qalaı áser etetinin baıandaıyq.
Qaı nysandar jańartylmaq?
Kompanııa mamandary 2026 jylǵy baǵdarlamaǵa kerneýi 35 kV jáne odan joǵary alty qosalqy stantsııany, 197 shaqyrymnan astam joǵary voltty áýe jelisin, kerneýi 0,4-10 kV shamamen 142 shaqyrym jelini, sondaı-aq 44 jıyntyq transformatorlyq kishi stantsııany engizgen. Osy jumystardyń barlyǵy jıyntyǵynda 340 shaqyrym jelini quraıdy.
Jańǵyrtý nelikten mańyzdy?
Kompanııanyń bas dırektory Aleksandr Pavlovtyń sózinshe, jańǵyrtýdyń basty maqsaty – tutynýshylardy elektrmen jabdyqtaýdyń senimdiligin arttyrý.
«Jańartý kezinde jabdyqtardyń tozýyn, ajyratýlar men energııa shyǵynyn azaıtý, sonymen qatar jańa abonentterdi qosý múmkindigin jasaý qajet. Bul sońǵy másele ásirese, Astana mańyndaǵy aımaq úshin ózekti. Óıtkeni elektr jelisi tek qazirgi júktemeni ǵana emes, jańa turǵyn úı keshenderin, áleýmettik nysandar men kásiporyndardy qosý úshin de qor bolýy kerek. Infraqurylymdy jańartpaı jáne keńeıtpeı, jańa tutynýshylardy qosý múmkindigi birte-birte azaıady», – dedi Aleksandr Pavlov.
Tsıfrlandyrý quraldary engizile me?
Ulttyq joba tek tozǵan jabdyq pen jelilerdi aýystyrýmen shektelmeıdi, jeke baǵyt elektrjelilik keshendi tsıfrlandyrýǵa arnalǵan.
Máselen, Makınsk qalasynda elektr energııasyn kommertsııalyq esepke alýdyń avtomattandyrylǵan júıesi engiziledi. Zamanaýı esepteý quraldary tutyný kólemin avtomatty túrde tirkep, derekterdi qolmen jınaýdyń qajeti joq júıege jiberedi. Bul turǵyndar úshin esepteýdiń dáldigin bildirse, energııa kompanııasy úshin tutyný týraly obektıvti aqparat alýdy jáne mańyzdy jaǵdaılardy tez taldaýdy bildiredi.
Taǵy bir tsıfrlyq joba – elordanyń oń jaǵalaýyndaǵy, onyń ishinde eski ortalyq pen qala ákimdigi ornalasqan aýdandy elektrmen qamtamasyz etetin «Astana» 110/10 kV kishi stantsııasynda júzege asady. Munda telemehanıka júıesi jańǵyrtylady, nátıjesinde jabdyqtyń jaı-kúıi týraly aqparat tikeleı ortalyq dıspetcherlik qyzmetke túsedi. Bul shtattan tys jaǵdaı týyndaǵanda sheshim qabyldaý ýaqytyn qysqartady – dıspetcher qosalqy stantsııanyń jumysyn qashyqtyqtan baqylap, jumys barysynda aqaý shyqqan kezde dereý áreket ete alady.
Kompanııanyń qazirgi jaı-kúıi
2026 jyldyń toǵyz aıynyń qorytyndysy boıynsha kompanııanyń tehnologııalyq shyǵyny 4,9 paıyzǵa jetip otyr. Bul salystyrmaly túrde tómen kórsetkish. Alaıda ınfraqurylymnyń edáýir bóligi áli de tozǵan nemese «sary aımaq» dep atalatyn sanatta tur. Mundaǵy tozý deńgeıi 63,9 paıyzdy quraıdy. Ulttyq joba aıasyndaǵy eski jabdyqtardy jańasyna aýystyrý jumystary dál osy kórsetkishti tómendetýge baǵyttalǵan.
Jańǵyrtýdyń nátıjesi qandaı bolmaq?
Turǵyndar úshin bul jumystyń nátıjesi aýystyrylǵan tirekter men symdardyń sanymen ólshenbeıdi. Naqty seziletin nátıje – ajyratýlar sanynyń azaıýy, elektrmen jabdyqtaýdyń senimdiligi, energııany esepke alýdyń dáldigi jáne aqaýlyq týyndaǵan kezde oǵan jaýap berý jyldamdyǵy.
Eske salsaq, Aqmola elektrjelilik úlestirý kompanııasy Ortalyq-Azııa Elektrenergetıkalyq Korporatsııasynyń (OAEK) quramyna kiredi – bul holdıng Qazaqstannyń 2 mıllıonnan astam turǵynyn energııamen qamtamasyz etetin iri jeke energetıkalyq kompanııa.
Aıta ketelik Qazaqstan 2029 jylǵa qaraı elektr energııasyn tutynýdan artyq óndirýdi kózdep otyr.
