Aqmola oblysynda ÝAZ kóligi traktor tirkemesine soǵylyp, eki adam kóz jumdy
KÓKShETAÝ. KAZINFORM – Aqmola oblysynda «ÝAZ» kóligi joldyń shetinde turǵan traktor tirkemesine soǵylyp, eki adam kóz jumdy.
Aqmola oblysy PD baspasóz qyzmetiniń málimetinshe, jol-kólik oqıǵasy «Ereımentaý-Erkinshilik-Arshaly» tas jolynyń 14 shaqyrymynda, ıaǵnı Taıbaı aýylynyń tusynda bolǵan.
ÝAZ «Patrıot» kóligi joldyń shetinde buzylyp turǵan traktor tirkemesine soǵylǵan. Saldarynan avtokólik jolaýshysy alǵan dene jaraqatynan oqıǵa ornynda kóz jumsa, 28 jastaǵy júrgizýshisi aýrýhanada qaıtys boldy.
«Anyqtalǵandaı, tirkemeniń jaryq shamdary janbaǵan jáne traktorǵa qosylmaǵan. Sonymen birge, apattyq belgi de qoıylmaǵan», - dedi vedomstvodan.
Osy rette, tártip saqshylary kólik júrgizýshileri men jaıaý júrginshilerdi joldarda óte qyraǵy bolýǵa, jol qozǵalysynyń qarapaıym erejelerin saqtaýǵa shaqyrady.
Aıta ketsek, Aqmola oblysynda eki júk kóligi soqtyǵysyp, bir adam kóz jumǵanyn jazǵan edik.
