Aqmola oblysynda Túrki jazýy kúnine arnalǵan konferentsııa ótti
KÓKShETAÝ. KAZINFORM — Túrki jazýy kúnine oraı Kókshetaý qalasynda «TURAN ÓRKENIETІNІŃ ASYL MURASY» atty túrki jazýy kúnine arnalǵan konferentsııa ótti dep habarlaıdy Aqmola oblysy ishki saıasat basqarmasy.
Sharanyń maqsaty — qazaq jazýynyń tarıhyna úńilip, qundy málimettermen bólisý.
Atalǵan konferentsııaǵa belgili ǵalymdar men professorlar, Kókshetaý qalasynyń zııaly qaýym ókilderi, tarıh pániniń muǵalimderi, sondaı-aq mádenıet jáne óner salasynyń qyzmetkerleri qatysty.
Sharada sóz sóılegen spıkerler Túrki jazýynyń qalyptasýy jaıynda qundy derektermen bólisip, óz usynystaryn aıtty.
— Ejelgi túrikter ózindik kelbetke ıe órkenıeti men jazý mádenıeti arqyly adamzat tarıhynyń damýyna, aqyl-oı qazynasynyń kemeldenýine zor úles qosty. Qadym zamandarda-aq ozyq mádenıetke qol jetkizgen babalarymyz óz álipbıin túzip, tól jazýyn tasqa tańbalady, — dedi Túrki akademııasynyń sarapshysy, fılologııa ǵylymdarynyń kandıdaty Aqedil Toıshanuly.
Sarapshynyń aıtýy boıynsha, Túrkologııa ǵylymynda bul jazýlardy «Orhon jazba eskertkishteri», «Eneseı jazba eskertkishteri», «Talas jazba eskertkishteri» dep ataıdy.
— Túrki halyqtarynyń tarıhy, mádenıeti — jalpy zattyq jáne rýhanı qundylyqtary bir ǵana tekten kóktegenine kúmán joq. Sodan baryp olardyń ortaq dúnıe tanymy qalyptasqan. Túrkologııada túrkitildes halyqtardyń tiliniń tarıhı tamyryn bir arnadan izdeý ejelden bar úrdis — dedi QR Ulttyq mýzeıi Mádenı murany ǵylymı-zertteý ınstıtýty Qazaqtyń dástúrli mádenıeti bóliminiń jetekshisi, PhD doktory Ardabı Maýlet.
Ol óziniń baıandamasynda túrki halyqtarynyń túbi bir ekendigine toqtala otyryp, aýqymdy dálelder keltirdi.
— Atalǵan sharanyń túrki halyqtary úshin mańyzdylyǵyn eskerip, aldaǵy ýaqytta osyndaı sharalardy júıeli túrde ótkizý kerek — dep óz usynysyn bildirdi L. N. Gýmılev atyndaǵy Eýrazııa ulttyq ýnıversıtetiniń professory, tarıh ǵylymdarynyń doktory Tursynhan Zákenuly.
Aıta ketsek, «TURAN ÓRKENIETІNІŃ ASYL MURASY» atty konferentsııa «Túrki jazýy» kúnine oraı uıymdastyrylǵan. Atalǵan mereke jyl saıyn atap ótiledi. Mysaly, ótken jyly Qazaqstan halqy Aqmola assambleıasynyń qaramaǵyndaǵy Qazaq, Qyrǵyz, Ózbek, Ázerbaıjan, Tatar jáne Chývash etnomádenı birlestikteriniń qatysýymen «RÝNA JAZÝLARY» atty túrki jazýy kúnine arnalǵan festıval ótti. Aldaǵy ýaqytta da túrki órkenıetiniń bolmysy men mádenıetinen habar beretin sharalardy ótkizý josparda bar.
Buǵan deıin Qazaqstan Túrki memleketteri uıymy Joǵarǵy sottarynyń konferentsııasyna qatysqanyn jazdyq.