Aqmola oblysynda týrıstik maýsym resmı túrde ashyldy
KÓKShETAÝ. KAZINFORM — Býrabaı aýdany dástúrli túrde Qazaqstan tabıǵatynyń injý-marjanymen baılanystyrylyp keledi. Alaıda bıylǵy týrıstik maýsym bul óńirdi múlde jańa, zamanaýı qyrynan tanytýdy kózdeıdi. Aqmola oblysynyń ákimi Marat Ahmetjanovtyń jumys sapary barysynda óńir qonaqtardy tek kórkem tabıǵatymen ǵana emes, damyǵan ınfraqurylymymen de tańǵaldyra alatynyn kórsetti.
Aýqymdy ózgerister Şýche qalasynyń qaq ortasynan bastaý aldy. Munda aýdany 15 myń sharshy metrdi quraıtyn jańa ortalyq ekopark paıdalanýǵa berildi. Joba aıasynda buryn bos jatqan aýmaq zamanaýı oıyn jáne sport alańdarymen jabdyqtalǵan jasyl demalys aımaǵyna aınaldy.
— Ótken jyly Býrabaıǵa shamamen bir jarym mıllıon týrıst keldi. Aıta ketý kerek, baqylaý-ótkizý beketteri Şýche-Býrabaı kýrorttyq aımaǵyna kelgen qonaqtardyń sanyn tirkeıdi, sondyqtan bul kórsetkish naqty týrıster sanynan tómen bolýy múmkin. Sonymen qatar bizde basqa da týrıstik baǵyttar bar. Júkeı jáne Shabaqty kólderi baǵytyndaǵy týrıstik marshrýttardy keńeıtip jatyrmyz. Osy maqsatta sý, jaıaý jáne at týrızmine arnalǵan aýqymdy demalys oryndary daıyndaldy. Bıyl óńirge shamamen eki mıllıon týrıst keledi dep kútip otyrmyz. Budan bólek, jyl boıǵy týrızmdi damytý baǵdarlamalaryn ázirleýdemiz. Osy baǵytta halyqaralyq týrnırler, sporttyq jarystar, kontsertter ótkizý jáne kongress-ortalyqty iske qosý josparlanǵan, — dedi Aqmola oblysynyń ákimi Marat Ahmetjanov.
Óńir basshysy aıtqan Býrabaı kýrorttyq aımaǵyndaǵy kópfýnktsıonaldy kongress-ortalyq óńirdegi iskerlik týrızmdi damytýdyń negizgi qozǵaýshy kúshi ári strategııalyq jobasyna aınalmaq. Onyń bazasynda halyqaralyq jáne respýblıkalyq deńgeıdegi saıası, mádenı jáne iskerlik is-sharalardy jyl boıy ótkizýge múmkindik beretin zamanaýı ınfraqurylym qalyptastyrý josparlanǵan.
1000 kórermenge arnalǵan eki qabatty zamanaýı keshen 13 myń sharshy metr aýmaqta ornalasady. Aýqymdy jobany júzege asyrý 2026–2028 jyldarǵa josparlanǵan. Mundaı deńgeıdegi nysannyń iske qosylýy Býrabaıdyń týrıstik áleýetin jańa deńgeıge kóterip, maýsymdyq táýeldilikti azaıtyp, óńirge iri bıznes ókilderi men halyqaralyq sarapshylardy tartýǵa múmkindik beredi.
Bıylǵy maýsymda qonaqúı ınfraqurylymyn jańǵyrtýǵa jáne qyzmet kórsetý sapasyn halyqaralyq deńgeıge shyǵarýǵa erekshe nazar aýdarylýda. Jumys sapary barysynda birqatar iri ınvestıtsııalyq jobalar tanystyryldy. Qazirgi ýaqytta Şýche-Býrabaı kýrorttyq aımaǵynda premıým sanattaǵy qonaqúılerdiń qurylysy júrgiziledi.
Jańa týrıstik nysandar saıahatshylarǵa qoryq aımaqtarynyń tereńine boılap, ekologııalyq jáne mádenı baǵyttaǵy biregeı marshrýttardy usynýǵa baǵyttalǵan. Solardyń biri — jyl boıy jumys isteıtin abattandyrylǵan «Bıshi qaıyńdar» saıabaǵy. Munda kelýshiler úshin tabıǵaty kórkem Aıýtas taýynyń basynda arnaıy baqylaý alańy jasaqtalǵan. Ol jerden óńirdiń ásem tabıǵatyn tamashalaýǵa múmkindik bar.
Sondaı-aq Júkeı kóliniń tarıhy men Aqylbaı aýylynyń mádenı murasyn tanytatyn jańa ekskýrsııalyq baǵyttar tanystyryldy. Sý serýenin unatatyndar úshin Býrabaı kólindegi jańartylǵan qaıyq stantsııasy qyzmet kórsetedi. Endi týrıster jaıly parommen áıgili Jumbaqtas jartasy men Kenesary úńgiri mańynda ekskýrsııalyq sapar jasap, tabıǵattyń kórkem kelbetin tamashalaı alady. Ekskýrsııalar qazaq jáne orys tilderinde júrgiziledi.
