Aqmola oblysynda týrıstik fırmanyń basshysy alaıaqtyq jasady dep kúdikke ilindi

AQMOLA. KAZINFORM — Aqmola oblysynda 39 azamat týrıstik agenttikke aldanyp qaldy. Kókshetaý qalasynyń 27 jastaǵy turǵyny shetelde demalýǵa bel býǵandardy san soqtyrǵan. 

Aqmola oblystyq polıtsııa departamentiniń baspasóz qyzmeti quqyq qorǵaý organdary alaıaqtyq jasady degen kúdikpen týrıstik fırma basshysyna qatysty sotqa deıingi tergeýdi aıaqtaǵanyn habarlady.

— Jábirlenýshilerden alǵashqy shaǵymdar Kókshetaý qalasynyń polıtsııa bólimine 2024 jyldyń jeltoqsan aıynda tústi. Aryz-shaǵymdar bıyl tamyz aıyna deıin jalǵasty. Aryzdanýshylar týrıstik agenttik týrıstik qyzmetterdi kórsetemiz degen jeleýmen olardyń qarajatyn zańsyz ıemdengenin habarlady. Aımaqtyń 39 turǵyny zańsyz áreketterdiń qurbany boldy. Jalpy shyǵyn shamamen 35 mıllıon teńgeni qurady, — dep habarlady oblystyq polıtsııa departamenti.

Polıtseıler kúdiktiniń 27 jastaǵy Kókshetaý qalasynyń turǵyny ekenin anyqtady. QR Qylmystyq kodeksiniń 190-baby («Alaıaqtyq») boıynsha sotqa deıingi tergeý aıaqtalyp, is sotqa jiberildi.

Oblystyq tártip saqshylary azamattardy qyraǵy bolýǵa jáne týrıstik fırmalardy muqııat tańdaýǵa shaqyrdy.

— Qyzmetter úshin tólem jasamas buryn kompanııanyń lıtsenzııasyn jáne tirkeýin tekserińiz. Ashyq kózderdegi tutynýshylardyń pikirlerin jáne agenttik bedelin qarap shyǵyńyz. Shynaıy bolý úshin tym jaqsy bolyp kórinetin usynystardan saq bolyńyz, óıtkeni olar alaıaqtyq bolýy múmkin. Tólemderdi tek kompanııanyń resmı bank derektemeleri arqyly júzege asyryńyz, — dep qosty departament.

Eske salaıyq, buǵan deıin Qarjylyq monıtorıng agenttigi alaıaqtyqtyń jańa túri týraly eskertkenin jazǵan bolatynbyz.