Aqmola oblysynda turǵynnyń joǵalǵan sómkesin taýyp bergen oqýshylar marapattaldy
Aqmola oblysynda turǵynnyń joǵalǵan sómkesin taýyp bergen oqýshylar marapattaldy. Kazinform bul týraly Polisia.kz-ke silteme jasap habarlaıdy.
24 qarashada Polıtsııa departamentiniń bastyǵy Nursultan Muqashev Kókshetaý qalasynyń № 2 mektep-lıtseıiniń 4 «j» synyp oqýshylaryn óz atynan marapattady. Bir kún buryn mektep oqýshylary Sabına Ádilbekova, Tamerlan Kósherov jáne Sulýhanym Merdaýlet departamenttiń front-ofısine kelip, oıyn alańynda qujattary, aqshalaı qarajattary men zergerlik buıymdary bar sómke tapqanyn habarlady.
Ata-analarymen keńeskennen keıin mektep oqýshylary polıtsııaǵa tabylǵan zatty ákelip, osylaısha quqyq qorǵaý organdary ıesiniń jeke basyn anyqtady. Bir saǵattan keıin Kókshetaý turǵyny alǵys aıtyp, sómkesin alyp ketti. Aıtýynsha, ol sómkesin 22 qarashada joǵaltqan jáne tabylady dep úmittenbegen. Jas aqmolalyqtardyń bul ıgi áreketi polıtseıler úshin nazardan tys qalmady. Osy sátti balalarmen birge synyptastary, qurdastary men muǵalimderi bólisti.
«Polıtsııa departamentiniń basshysy retinde óskeleń urpaqtyń patrıotızm sezimi men bolyp jatqan jaǵdaıǵa beıjaı qaramaıtynyn túsingenime qýanyshtymyn», – dedi Nursultan Muqashev oqýshylarǵa.
Aımaqtyń bas polıtsııasynyń aıtýynsha, bul áreket – balalaryn tárbıelep otyrǵan ata-analar men muǵalimderdiń kómekke kelýge daıyn turatynynyń aıqyn dáleli.
Barlyq jeke quram atynan N.Muqashev sonymen qatar ata-analar men oqytýshylar quramyna alǵysyn bildirdi. Departament bastyǵy balalarǵa alǵys hattar men estelik syılyqtar tabys etti.
