Aqmola oblysynda tisin emdetken jasóspirim qaıtys boldy

Aqmola oblysynda tis dárigerine barǵan 17 jastaǵy jasóspirimniń qaıtys bolýyna baılanysty densaýlyq saqtaý departamenti mamandary tarapynan tekseris bastaldy, dep habarlaıdy QazAqparat tilshisi.

Aqmola oblystyq densaýlyq saqtaý basqarmasy baspasóz qyzmetiniń málimetinshe, tekseris aıaqtalǵan soń qandaı da bir qorytyndy shyǵarylatyn bolady.

- Aqmola oblysynyń Densaýlyq saqtaý basqarmasy janynan tekserý júrgizý jáne zańbuzýshylyq anyqtalǵan jaǵdaıda tıisti sharalar qabyldaý úshin arnaıy komıssııa qurylady. Sonyń qorytyndysy boıynsha tolyq ári naqty aqparat beretin bolamyz, - dedi vedomstvodan.

Aıta ketsek, jaqynda Kókshetaýdyń irgesindegi Krasnoıar aýylynyń turǵyny Záýre Kúshinova áleýmettik jelide medıtsına qyzmetkerleriniń nemquraılylyǵy saldarynan 17 jasar ulynan aıyrylyp qalǵany týraly jazdy.

Onyń aıtýynsha, tamyz aıynda bala ózi turatyn Krasnoıar aýylyndaǵy emhanada tis dárigerinen em alǵan. Keıin kóp uzamaı balanyń dene qyzý 42 gradýsqa kóterilgen. Dárigerler oǵan tamaǵy qyzarǵandyqtan «angına» dıagnozyn qoıyp emdegen. Alaıda, jasóspirimniń jaǵdaı odan saıyn nasharlap, beti qısaıyp, aıaǵy sal bolyp qalady. Artynsha birneshe kún ótken soń ol jansaqtaý bólimshesinde komaǵa túsip, kóz jumady.

Aqmola oblystyq PD baspasóz qyzmetiniń málimetinshe,

- Atalǵan derek boıynsha Kókshetaý qalalyq polıtsııa basqarmasy sotqa deıingi tergep-tekserýdi bastady, onyń barysynda bolǵan oqıǵanyń barlyq mán-jaılary zertteletin bolady. Sonymen qatar, QR Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń Aqmola oblysy boıynsha departamentine tıisti tekserý júrgizý úshin materıal jiberildi, - dedi PD baspasóz qyzmetinen.

Aıta ketsek, budan buryn Aqmola oblysynda ata-anasy qan quıýǵa qarsy bolǵan sábıdiń qaıtys bolǵanyn jazǵan edik.