Aqmola oblysynda tirkelmegen 7 myńnan astam jylqy men jalǵan vaktsınatsııa deregi anyqtaldy
ASTANA. KAZINFORM — Zerendi aýdanynyń prokýratýrasy veterınarııalyq qaýipsizdikti qamtamasyz etý jumystarynyń tıisti deńgeıde júrgizilmegenin anyqtady. Mal basynyń esebin júrgizýde naqty derekterdiń joqtyǵy belgili bolǵan. Bul týraly Aqmola oblysy prokýratýrasy málim etti.
— Polıtsııanyń ýchaskelik ınspektorlarymen birlesken is-sharalar barysynda jalpy sany 7 myńnan asatyn 57 tirkelmegen jylqy tabyny anyqtaldy. Sondaı-aq epızootııaǵa qarsy is-sharalardy júrgizý kezinde zań buzýshylyqtar anyqtaldy: veterınarııalyq dárigerler vaktsınatsııa aktilerine jalǵan málimetter engizip, onyń ishinde joq janýarlardy kórsetken jáne bir mal basyn birneshe ret esepke aldy, — delingen habarlamada.
Prokýratýranyń málimetinshe, jalpy sany 2,8 myń jalǵan vaktsınatsııa faktisi anyqtalyp, memlekettik bıýdjetke 996,2 myń teńge kóleminde shyǵyn ótelgen.
— Aýdandaǵy 14 mal qorymy veterınarııalyq talaptarǵa sáıkes kelmeıdi — qorshaýlary joq, jer ýchaskeleri rásimdelmegen jáne balansqa qoıylmaǵan. Sonymen qatar veterınarııalyq stantsııada 6 mln teńgeden astam somaǵa negizsiz syıaqy men ústemaqy esepteý faktileri anyqtaldy, qazirgi ýaqytta onyń 4 mln teńgeden astamy bıýdjetke qaıtaryldy, — dep habarlady quzyrly organnan.
Prokýrorlyq qadaǵalaý aktileri boıynsha kináli laýazymdy tulǵalar tártiptik jáne ákimshilik jaýapkershilikke tartyldy, zań buzýshylyqtardy joıý sharalary qabyldanǵan.
Eske sala keteıik, buǵan deıin Túrkistanda veterınarııa salasynda 928 mln teńge jymqyrylyp, 4 adam qamaýǵa alyndy.
