Aqmola oblysynda tótenshe jaǵdaılar salasynyń jańa mamandandyrylǵan bólimshesi ashyldy
ASTANA. KAZINFORM - Qazaqstannyń qutqarý qyzmetteri júıesin jańǵyrtý aıasynda Aqmola oblysynyń Makınsk qalasynda órt sóndirýshiler men medıtsınalyq personaldyń fýnktsııalaryn biriktiretin jańa mamandandyrylǵan bólimshe ashyldy.
QR Tótenshe jaǵdaılar mınıstrligi baspasóz qyzmetiniń habarlaýynsha, bul qadam qutqarý qyzmetteriniń ózara is-qımylyn jaqsartýǵa jáne tótenshe jaǵdaılarǵa den qoıýdyń jedeldigin arttyrýǵa baǵyttalǵan pılottyq jobanyń mańyzdy elementi boldy.
Qazaqstan Respýblıkasynyń Tótenshe jaǵdaılar mınıstri general-maıor Shyńǵys Árinov Makınsktegi jańartylǵan №8 órt sóndirý bólimine jeke ózi baryp, kúrdeli jóndeý jáne jańǵyrtý nátıjelerimen tanysty. 1964 jyly salynǵan órt sóndirý bólimi rekordtyq merzimde, ıaǵnı ótken jyldyń qazan aıynan bastap birneshe aı ishinde tolyǵymen jańartyldy. Búginde ol óńirdiń qaýipsizdigin qamtamasyz etýdegi zamanaýı tásildiń úlgisi bolyp tabylady.
«Órt sóndirý bólimderin jańǵyrtý jáne qutqarý jumystaryn júrgizip qana qoımaı, medıtsınalyq kómek kórsete alatyn biregeı bólimsheler qurý — azamattarymyzdyń qaýipsizdigin nyǵaıtýdaǵy mańyzdy qadam. Makınsktegi bul joba tek bastamasy. Biz búkil el boıynsha qutqarý bólimshelerin damytýdy jáne jańǵyrtýdy jalǵastyramyz», - dep atap ótti mınıstr Shyńǵys Árinov.
Jańa bólimsheniń basty erekshelikteriniń biri órt sóndirýshiler men dárigerlerdiń fýnktsııalaryn biriktirý bolyp tabylady, bul tótenshe jaǵdaılarǵa den qoıýdyń jedeldigi men tıimdiligin aıtarlyqtaı arttyrady. Jańǵyrtý sheńberinde qutqarýshylardyń eńbek jaǵdaılary da jaqsardy: ǵımarat jańartyldy, dýsh bólmesi, as úı, jýynatyn bólmeler men demalys bólmelerin qosa alǵanda, qyzmettik jáne turmystyq úı-jaılar zamanaýı túrde jaılastyryldy. Buǵan qosa, tehnıkaǵa arnalǵan boks pen «BATYR TEAM» vedomstvolyq klýbynyń jattyǵý zaly jabdyqtaldy.
«Astana-Kókshetaý» avtojolynda ornalasqan trassalyq medıtsınalyq-qutqarý pýnktiniń jańadan qurylǵan medıtsınalyq kabınetke kóshýi jańǵyrtýdyń taǵy bir mańyzdy bóligi boldy. Medıtsınalyq bloktyń zamanaýı jabdyqtary shuǵyl kómektiń sapasyn arttyrýǵa jáne medıtsınalyq personaldyń jumys isteýi úshin qolaıly jaǵdaı jasaýǵa múmkindik beredi.
Jańǵyrtý sheńberinde jańa bólimsheniń barlyq jeke quramy jańa nysandy kıim-keshekpen jáne arnaıy tehnıkamen qamtamasyz etildi. Іs-shara barysynda Shyńǵys Árinov qutqarý bólimsheleriniń formýlıarynda estelik jazba qaldyrdy.
«Bul qadam biryńǵaı qutqarý jáne densaýlyq saqtaý júıesin qurýdyń mańyzdy elementi bolyp tabylady. Biz bul pılottyq jobanyń tabysy tótenshe jaǵdaılarǵa jyldamyraq den qoıý jáne zardap shekkenderge kómek kórsetýdi jaqsartý úshin jańa múmkindikter ashatynyna senimdimiz», - dep atap ótti Shyńǵys Árinov.
Jańa bólimshe 30 myńnan astam adam turatyn birneshe jaqyn eldi mekenderdegi qaýipsizdikti qamtamasyz etedi. Qutqarýshylar da avtojol ýchaskelerine baryp, apattardyń saldaryn joıatyn bolady.
Іs-shara sońynda Mınıstr vedomstvolyq nagradalar usyndy. Aqmola oblysy TJD bastyǵynyń mindetin ýaqytsha atqarýshy Baqytjan Alashov «Azamattyq qorǵaý júıesin damytýǵa qosqan úlesi úshin» tósbelgisimen nagradtaldy. «QAZAQSTANDYQ QUTQARÝShYLAR QORY» JQ basshysy Rashıd Januzaqov qurmet gramotasyn aldy, al 8-MÓSB júrgizýshileri Erlan Arynǵazın men Sergeı Popov joǵary kásibıligi úshin alǵys hattar aldy.
Tótenshe jaǵdaılar mınıstrligi ozyq tehnologııalarmen jabdyqtalǵan jańa zamanaýı bólimshelerdi qura otyryp, materıaldyq-tehnıkalyq bazany belsendi damytýdy jáne qutqarýshylardyń eńbek jaǵdaılaryn jetildirýdi jalǵastyrýda. Bul tótenshe jaǵdaılarǵa den qoıýdyń jedeldigin arttyrýǵa jáne búkil el boıynsha qutqarý operatsııalarynyń sapasyn jaqsartýǵa múmkindik beredi.
Osyǵan deıin TJM ókili qys qarly bolatynyna baılanysty mınıstrlik ókilderi tasqynǵa daıyndalatynyn aıtqan edi.