Aqmola oblysynda teri ınfektsııalary artyp keledi

KÓKShETAÝ. KAZINFORM — Aqmola oblysynda teri ınfektsııalarynyń óskeni tirkeldi. Aýrýǵa shaldyqqandardyń 60%-dan astamy – balalar, dep habarlaıdy Kazinform agenttiginiń óńirdegi tilshisi.

Aqmola oblysynyń bas memlekettik sanıtarııalyq dárigeri Serik Omarhanovtyń aıtýynsha, bıyl óńirde teri ınfektsııalarynyń ósýi 1,7 ese artqan. Barlyǵy 392 jaǵdaı anyqtalǵan: onyń ishinde 21 – qyshyma, 371 – dermatomıkoz. Aýrý juqtyrǵandardyń 237-si – balalar (60,4%).

— Zararlaný faktorlarynyń negizgisi: naýqas adamdarmen baılanys — 18%, úı janýarlarymen — 23%, qańǵybas janýarlarmen — 34%. Sonymen qatar juqtyrý jaǵdaılarynyń 25%-y basqa óńirlerden kelgen naýqastarǵa baılanysty. Aýrýdyń ósýi jeke gıgıena talaptarynyń saqtalmaýy jáne halyqtyń aldyn alý sharalary týraly aqparattanýynyń tómen bolýymen baılanysty, — dedi S.Omarhanov.

Buǵan qosa, bıylǵy 10 aıda ótken jyldyń sáıkes kezeńimen salystyrǵanda jedel ishek ınfektsııalary da 1,1 ese artqan. Barlyǵy 322 jaǵdaı tirkelgen. Onyń 207-si — 14 jasqa deıingi balalar (64,2%).

— Eń joǵary kórsetkish Býrabaı aýdanynda (100 jaǵdaı), Kókshetaýda (101 jaǵdaı) jáne Esil aýdanynda (36 jaǵdaı) tirkelip otyr. Býrabaı aýdanynda eki jergilikti juqpa oshaǵy tirkeldi, Atbasar aýdanynda da jekelegen jaǵdaılar baıqaldy, — dep qosty oblystyń bas sanıtarııalyq dárigeri.

Jedel ishek ınfektsııalary qurylymynda 59,9% jaǵdaıdyń etıologııasy naqtylanǵan, al 39,7% — anyqtalmaǵan. Bul epıdbaqylaýdy jáne zerthanalyq qadaǵalaýdy kúsheıtý qajettigin kórsetedi.

Eske sala ketsek, Pavlodarda balalar arasynda vırýsty ınfektsııa órship, aýrýhana naýqastarǵa tolyp qalǵanyn jazdyq.

Sondaı-aq Densaýlyq saqtaý vıtse-mınıstri Tımýr Muratov keıbir iri qalalardaǵy ınfektsııalyq statsıonarlarǵa naýqastardyń kóptep kelip jatqanyn rastady.