Aqmola oblysynda tekserilgen balalar taýarlarynyń 43%-y talapqa saı emes

ASTANA. KAZINFORM – Aqmola oblysy boıynsha Sanıtarııalyq-epıdemıologııalyq baqylaý departamenti 2025 jyly júrgizilgen tekseristeriniń nátıjesin jarııalady.

Vedomstvo málimetinshe, zerttelgen balalar men jasóspirimderge arnalǵan taýarlardyń 43%-y tehnıkalyq reglament talaptaryna sáıkes kelmegen. Onyń ishinde buzýshylyqtardyń 23%-y balalar kıimine tıesili.

Talapqa saı kelmegen ónimder Túrkııa, Qytaı, Koreıa, Qyrǵyzstan elderinde óndirilgen, sondaı-aq óndirýshisi belgisiz taýarlar da anyqtalǵan.

Departament ókilderiniń aıtýynsha, negizgi zańbuzýshylyqtar tańbalaýǵa qatysty. Atap aıtqanda, memlekettik jáne orys tilderinde aqparattyń bolmaýy, óndirýshi, óndirilgen el jáne daıyndalǵan kúni týraly derekterdiń kórsetilmeýi tirkelgen.

Mamandar balalarǵa, ásirese bir jasqa deıingi sábılerge arnalǵan taýarlardy tańdaǵanda qaýipsizdik talaptaryna erekshe nazar aýdarýǵa shaqyrady. Atap aıtqanda, ótkir qyrlardyń, aqaýlar men zaqymdardyń bolmaýy, materıal sapasy (jańa týǵan náresteler úshin tabıǵı matalar), konstrýktsııa qaýipsizdigi (arbalarda qaýipsizdik beldikteriniń bolýy, qaýipti sańylaýlar men bólshekterdiń bolmaýy), sondaı-aq tolyq ári oqylatyn tańbalaýdyń bolýy mańyzdy.

Tańbalaýda ónimniń shyqqan eli, óndirýshi nemese ımporttaýshy týraly málimet, ataýy, daıyndalǵan kúni jáne naryqta aınalymǵa jiberilgenin rastaıtyn biryńǵaı belgi kórsetilýi tıis. Keıbir taýarlar úshin paıdalaný jáne kútim jasaý jónindegi nusqaýlyqtyń bolýy mindetti.

Departament ata-analardy balalarǵa arnalǵan ónimderdi satyp alý kezinde muqııat bolýǵa shaqyrdy. Mamandardyń aıtýynsha, sapaly ári qaýipsiz taýardy tańdaý – balanyń densaýlyǵyn saqtaýǵa qosylǵan úles.

Aıta keteıik, balalardyń uıaly telefondarynyń SIM-kartalaryn tirkeý tetigi engiziledi.