Aqmola oblysynda «Taza Qazaqstan» aktsııasy aıasynda júzdegen erikti tabıǵatty qorǵaýǵa atsalysty
KÓKShETAÝ. KAZINFORM - Aqmola oblysynda «Taza Qazaqstan» respýblıkalyq ekologııalyq baǵdarlamasy aıasyndaǵy kezekti aýqymdy tazalyq aktsııasy ótti. Bul joly ıgi bastama Arshaly jáne Tselınograd aýdandary men Qosshy qalasyn qamtyp, júzdegen erikti, jastar men qoǵam belsendilerin ortaq maqsatqa – tabıǵatty taza ustaýǵa jumyldyrdy.
Ekologııalyq aktsııalardyń birine Aqmola oblysynyń ákimi Marat Ahmetjanov arnaıy qatysyp, Arshaly aýdanyndaǵy Astana sý qoımasynyń jaǵalaýynda júrgizilgen tazalyq jumystaryna qoldaý bildirdi. Óńir basshysy eriktilermen birge jaǵalaýdy aralap, qorshaǵan ortany qorǵaýǵa baǵyttalǵan jumystardyń mańyzyn atap ótti.
Jaz mezgilinde ózen-kólderdiń jaǵasy demalýshylarǵa tolady. Alaıda tabıǵat aıasyndaǵy demalystan keıin keıbir azamattardyń qaldyryp ketetin turmystyq qaldyqtary ekologııaǵa aıtarlyqtaı zııan keltiredi. Ásirese elordanyń negizgi aýyz sý kózi sanalatyn Astana sý qoımasynyń tazalyǵyn saqtaý erekshe mańyzǵa ıe.
Osyǵan baılanysty tazalyq jumystarynyń negizgi bóligi dál osy sý qoımasynyń jaǵalaýynda uıymdastyryldy. Qoldaryna qolǵap pen qoqys qaptaryn ustaǵan 150 erikti jaǵalaýdy turmystyq qaldyqtardan tazartty.
Astana sý qoımasy – strategııalyq mańyzy bar nysan. Sondyqtan munda sanıtarlyq talaptar qatań saqtalady. Sý aıdynynyń belgili bir bólikterinde shomylýǵa, demalýǵa jáne kólikpen kirýge tyıym salynǵan. Soǵan qaramastan, keıbir demalýshylar eskertý belgilerin elemeı, jaǵalaýǵa zańsyz kirip, ot jaǵyp, qoqys qaldyryp ketedi. Mundaı áreketter aýyz sý sapasyna ǵana emes, jaqyn mańdaǵy egistik pen eldi mekenderdiń qaýipsizdigine de qaýip tóndiredi.
-Bul jumystar bizde júıeli túrde júrgizilip keledi. Ásirese sý aıdyndary men halyq kóp demalatyn oryndar erekshe baqylaýda. Negizgi maqsat – qoǵamda tazalyq mádenıetin qalyptastyrý. Tabıǵatqa janashyrlyq tanytý – ár azamattyń mindeti. Zań talaptary barshaǵa birdeı, – dedi oblys ákimi Marat Ahmetjanov.
Óńir basshysy tabıǵatty qorǵaý talaptaryn buzǵan azamattarǵa ákimshilik jaza qoldanylatynyn, al qorshaǵan ortaǵa eleýli zalal keltirilgen jaǵdaıda qylmystyq jaýapkershilik qarastyrylatynyn da eske saldy.
Quqyq qorǵaý organdarynyń málimetinshe, Arshaly aýdanynda jyl basynan beri tyıym salynǵan aýmaqtarda shomylǵany úshin 50-ge jýyq ákimshilik hattama rásimdelgen. Sonymen qatar abattandyrý qaǵıdalaryn buzyp, qoqys tastaǵan azamattarǵa qatysty 400-ge jýyq hattama toltyrylǵan.
Polıtsııa qyzmetkerleriniń aıtýynsha, demalys kúnderi bul aýmaqqa Astanadan keletin demalýshylardyń sany aıtarlyqtaı kóbeıedi. Soǵan qaramastan keıbir turǵyndar arnaıy jabdyqtalǵan demalys oryndarynyń ornyna sý qoımasynyń jabyq jaǵalaýyn tańdaýdy jalǵastyryp keledi. Al aýdanda Jibek joly aýylyndaǵy basseınder men Jaltyrkól kólindegi resmı jaǵajaılar demalýshylar úshin qoljetimdi.
Mamandardyń aıtýynsha, sý qoımasynyń tereńdigi de úlken qaýip tóndiredi. Sondyqtan ruqsat etilmegen oryndarda shomylý adam ómirine qaterli. Osyǵan baılanysty óńirde polıtsııa qyzmetkerlerinen quralǵan birlesken mobıldi toptardyń baqylaýy kúsheıtiledi.
Eriktiler tabıǵatty qorǵaý tek tazalyq aktsııalarymen nemese aıyppul salýmen shektelmeýi tıis ekenin aıtady. Olardyń pikirinshe, eń mańyzdysy – ár adamnyń qorshaǵan ortaǵa degen jaýapkershiligin qalyptastyrý.
-Biz bul jerge tek qoqys jınaý úshin kelgen joqpyz. Basty maqsatymyz – adamdardyń tabıǵatqa degen kózqarasyn ózgertý. Ár adam demalǵan jerin taza qaldyrýdy ádetke aınaldyrsa, mundaı aýqymdy senbilikterdiń de qajeti azaıar edi, – deıdi aktsııaǵa qatysýshy Vladıslav Poddýbnyı.
Ekologııalyq aktsııa barysynda Arshaly aýdanyndaǵy Astana sý qoımasynyń jaǵalaýynan 237 tekshe metr qoqys shyǵaryldy. Al Tselınograd aýdanynda jáne Qosshy qalasynda ótken tazalyq sharalary kezinde taǵy 500 tekshe metrge jýyq turmystyq qaldyq jınaldy.
Uıymdastyrýshylardyń aıtýynsha, mundaı aktsııalar qorshaǵan ortany qorǵaýǵa ǵana emes, qoǵamda ekologııalyq mádenıetti qalyptastyrýǵa da yqpal etedi. Arshaly, Tselınograd aýdandary men Qosshy qalasynda ótken senbilikterge júzden astam adam qatysyp, týǵan ólkeniń tazalyǵy úshin birlesip eńbek etti.
