Aqmola oblysynda «Taza Qazaqstan» aktsııasy aıasynda 100-den astam aǵash ekti
KÓKShETAÝ. KAZINFORM – Zerendi aýylynda 250-den astam adamdy biriktirgen «Týǵan eldiń tazalyǵy – eldiń abyroıy» atty aýqymdy ekologııalyq is-shara ótti.
Іs-shara Memleket basshysynyń tapsyrmasy aıasynda uıymdastyrylǵan respýblıkalyq «Taza Qazaqstan» aktsııasy sheńberinde ótkizilip, ekologııalyq ahýaldy jaqsartýǵa jáne eldi mekenderdi abattandyrýǵa baǵyttaldy.
Aktsııaǵa jergilikti atqarýshy organdardyń ókilderi, aýdandyq máslıhat depýtattary, eriktiler men aýyldyń belsendi turǵyndary qatysty. Vostochnaıa kóshesi boıynda ótken jumystar barysynda 100-den astam aǵash kóshetteri otyrǵyzylyp, aýmaq sanıtarlyq tazartýdan ótkizilip, ǵımarattardyń qasbetteri ákteldi.
— «Taza Qazaqstan» — bul jaı ǵana ekologııalyq aktsııa emes. Bul — týǵan jerge degen janashyrlyq pen keler urpaq aldyndaǵy jaýapkershiliktiń kórinisi. Tazalyq ár adamnan bastalady: taza aýla, taza kóshe, taza aýyl — barshamyzǵa ortaq mindet, — dep atap ótti Zerendi aýdanynyń ákimi Áset Qurmanǵojın.
Sonymen qatar bastamaǵa qoǵam belsendileri men ardagerler uıymdarynyń ókilderi de qosylyp, abattandyrý jumystaryna júıeli kózqarastyń mańyzyn atap ótti.
— Tabıǵatqa janashyrlyqpen qaraý — jasyna qaramastan barlyǵymyzdy biriktiretin ortaq paryz. Osyndaı bastamalar jastardyń boıynda eńbekke degen súıispenshilikti, qorshaǵan ortaǵa jáne týǵan jerge qurmetti qalyptastyrady. Aýyl men eldiń bolashaǵyna degen jaýapkershilik dál osyndaı ıgi isterden bastalady, — dedi Zerendi aýdandyq bıler keńesiniń tóraǵasy Serik Baımýrzın.
Óńirdegi ekologııalyq sharalardyń oń qarqyny aqparattyq qoldaýmen jáne blogerlerdiń belsendi qatysýymen nyǵaıtylyp keledi.
Zerendi aýdanyndaǵy abattandyrý jumystary aldaǵy ýaqytta da turaqty túrde jalǵasyp, ekologııalyq mádenıetti qalyptastyrýǵa turǵyndardyń barǵan saıyn kóbirek tartylýy kózdelýde.
