Aqmola oblysynda taý shańǵysy bazasynyń basshysy sottaldy
KÓKShETAÝ. KAZINFORM - Aqmola oblysynda qaýipsizdik erejeleriniń saqtalmaýy saldarynan demalýshy qaza bolǵan taý shańǵysy bazasynyń basshysy 4 jylǵa sottaldy.
Aqmola oblystyq soty baspasóz qyzmetiniń málimetinshe, «Elikti» taý shańǵysy bazasy aýmaǵynda qyzmet kórsetken JShS dırektory demalýshylardyń qaýipsizdigin qamtamasyz etpegen. Bul abaısyzda kámelettik jasqa tolmaǵan balanyń ólimine (Qylmystyq kodekstiń 306-baby 3-bóligi) jáne taǵy eki adamnyń densaýlyǵyna zııan kelýine ákep soqqan (Qylmystyq kodekstiń 2-tarmaǵynyń 306-bóligi). JShS ákimshiligi jasóspirimge qaýipsizdik erejesin túsindirmeı, taý shańǵysy trassasyna shyǵýyna ruqsat bergen. Saldarynan ol bıikten syrǵanaý kezinde qorshalmaǵan aǵashqa soǵylyp, alǵan dene jaraqatynan qaza tapty.
«Sotta jasóspirimniń trassaǵa nusqaýsyz jáne qaýipsizdik erejelerin túsindirýsiz shyǵarylǵany, onda qozǵalys belgileri, qorǵanys torlary, eskertý belgileri, qorǵanys tósenishteri, aǵashtardyń aldyndaǵy qorshaýlar bolmaǵany anyqtaldy. Sonymen birge, shańǵy bazasynda medıtsınalyq personal, kútpegen jaǵdaılar týyndaǵan kezde is-qımyl algorıtmi, taý shańǵysy trassasy men aspaly joldy paıdalanýǵa ruqsat berý qujattary joq bolyp shyqty. Qyzmet kórsetýshi personal, nusqaýshylar eńbek qyzmetin kásibı daıarlyqsyz júzege asyrǵan. Aspaly joldyń kólbeý buryshy men shańǵy jolynyń kólbeý buryshy ruqsat etilgen mánnen edáýir asyp túsken», - dedi vedomstvodan.
Alaıda, JShS dırektory osy kemshilikterdi joıýdyń ornyna, qyzmetin odan ári jalǵastyra bergen. Qaýipsizdiktiń tıisti deńgeıde bolmaýy saldarynan taǵy eki demalýshy aýyr dene jaraqatyn alady. Aýa raıynyń jaısyzdyǵyna qaramastan, demalýshylardyń biri kótergishpen taýdyń basyna shyqpaqshy bolǵan. Qatty jelden ol kótergishten qulap, bel omyrtqasy syndy. Dál osyndaı jaǵdaıdy ekinshi demalýshy da bastan ótkerdi, kótergishten qulaǵan ol búıregin jaraqattap aldy.
«Jaza taǵaıyndaý kezinde sot qylmystyq jaýapkershilikti jeńildetetin jaǵdaıdy, ıaǵnı sottalýshynyń jas balasynyń bolýy dep eseptedi. Al quqyq buzýshylyqtardyń qaıtalanýyn aýyrlatatyn mán-jaı dep tanydy. Zerendi aýdandyq sotynyń úkimimen taý shańǵysy bazasynyń dırektoryna qyzmet kórsetý salasynda 3 jylǵa aınalysý quqyǵynan aıyra otyryp, 4 jylǵa bas bostandyǵynan aıyrý jazasy taǵaıyndaldy», - dedi vedomstvodan.
Sonymen birge, sottalýshydan japa shekken eki adamnyń paıdasyna árqaısysyna 10 000 000 teńgeden, qaıtys bolǵan adamnyń paıdasyna-3 000 000 teńgeden moraldyq zııan, keltirilgen materıaldyq zalal óndirilip aldy.
Budan basqa, talapkerler azamattyq sot isin júrgizý tártibimen materıaldyq zalaldy óndirip alý bóliginde JShS-ge azamattyq talap qoıýdy qanaǵattandyrý quqyǵyn moıyndady.
Sot aktisi zańdy kúshine engen joq.
Aıta ketsek, budan buryn Aqmola oblysynda esirtki satqan mektep jattyqtyrýshysy 10 jylǵa sottalǵanyn jazǵan edik.
