Aqmola oblysynda tasqynnyń aldyn alý sharalary bastalyp ketti

ASTANA. KAZINFORM – Aqmola oblysynyń ákimi Marat Ahmetjanov óńirde kóktemgi sý tasqynynyń aldyn alýǵa arnalǵan is-sharalardyń úsh ese artqanyn málim etti.

- Sý tasqynynyń saldaryn joıý jumysy aıaqtaldy. Oblys aýmaǵynda tasqynnan 1266 otbasy zardap shekti. Bul oraıda 820-dan astam otbasyǵa múlik shyǵyny jáne 715 otbasyǵa úılerin jóndeýge ótemaqy tólendi. Sonymen qatar, shamamen 2 myń otbasy ataýly áleýmettik kómek aldy. Sol sııaqty 221 otbasy úshin páterler men turǵyn úıler satyp aldyq jáne 330 otbasyǵa jańa úıler salyp berdik, - dedi Marat Ahmetjanov Ortalyq kommýnıkatsııalar qyzmeti alańynda ótken baspasóz máslıhatynda. 

Ákimniń aıtýynsha, sý shaıǵan barlyq jol ýchaskesi qalpyna keltirildi. 

- Qazir oblysta sý tasqynyna qarsy is-sharalar kólemin ótken jylǵa qaraǵanda úsh esege kóbeıttik. Búginde 174 eldi mekende 65 shaqyrym sý ótkizý arnasy jasalyp, 38 shaqyrym ózen arnasy tazartyldy, sý ótkizý arnasynyń 34 shaqyrymy keńeıtilip, tereńdetildi. Sol sııaqty 110 shaqyrym bóget nyǵaıtylyp, 21 shaqyrym jańa bógeý turǵyzyldy, sý ótkizý qurylystary júrgizilip, sý qubyrlary tazartyldy. Odan bólek 9 eldi mekende sý deńgeıin baqylaý úshin qosymsha gıdro beketter quryldy, - deıdi ol. 

Sondaı-aq oblys ákimi elorda irgesindegi Tselınograd aýdanynyń Talapker jáne Qoıandy aýyldarynda erigen sýdy ótkizýge arnalǵan jalpy uzyndyǵy 8 shaqyrymdy quraıtyn aınalma kanaly salynǵanyn aıtty. 

- «Demeý Qazaqstan» qory esebinen 3 bóget salynyp, ıaǵnı Jabaı, Shaǵalaly jáne Qalqutan ózenderiniń jaǵasy nyǵaıtylyp jatyr, - dep tolyqtyrdy M. Ahmetjanov.