Aqmola oblysynda tas jolda bolǵan jol apatynan úsh adam qaza tapty
ASTANA. KAZINFORM — Qazir jol-kólik oqıǵasy bolǵan jerde polıtsııa qyzmetkerleri jumys istep jatyr, jol qaýipsizdigin qamtamasyz etý sharalary qabyldanǵan.
Aqmola oblysyndaǵy tas jolda bolǵan iri jol-kólik oqıǵasynyń vıdeosy áleýmettik jelide paıda boldy.
Keıbir pikir bildirýshiler apattan kóptegen kóliktiń zaqymdanǵanyn, sondaı-aq bul jaǵdaı kútpegen jerden bolǵanyn atap ótti.
Oblystyq Polıtsııa departamentiniń baspasóz qyzmeti 1 qarashada Astana-Petropavl tas jolynda bolǵan apatqa baılanysty qylmystyq is qozǵalǵanyn habarlady.
- Eki adam oqıǵa ornynda qaza tapty, keıinirek bireýi aýrýhanada qaıtys boldy, basqa da jaraqat alǵandar bar. Qazirgi ýaqytta polıtsııa oqıǵa ornynda jumys istep, jol qaýipsizdigin qamtamasyz etý sharalaryn qabyldap jatyr. Oqıǵanyń mán-jaıy sotqa deıingi tergeý aıasynda anyqtalady, - dedi departamentten.
Quqyq qorǵaý organdarynyń qyzmetkerleri ázirge soqtyǵysqan kólikterdiń naqty sanyn aıta almasa da, olardyń sany úsheýden kóp bolǵanyn ǵana atap ótti.
Polıtsııa júrgizýshilerdi jol qozǵalysy erejelerin qatań saqtaýǵa, jol jáne aýa raıy jaǵdaılaryna baılanysty qaýipsiz jyldamdyqty tańdaýǵa, araqashyqtyqty saqtaýǵa jáne asa saqtyqpen júrgizýge shaqyrdy.
Qostanaıda avtobýspen soqtyǵysqan kólik júrgizýshisi qaza tapqanyn jazǵan edik.
