Aqmola oblysynda sý tasqynynyń aldyn alý jobalaryna 5,5 mlrd teńge bólindi
ASTANA. KAZINFORM — Qarajat Qalqutan ózeniniń arnasyn tazartýǵa, Osnovnoe bógenindegi shlıýz-qaqpalardy jóndeýge jáne Ivankovskaıa bógenin rekonstrýktsııalaýǵa baǵyttalǵan, dep habarlaıdy Úkimettiń baspasóz qyzmeti.
Úkimet Memleket basshysynyń «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýynda jarııalanǵan «Halyqtyq qurylys» baǵdarlamasy aıasynda Aqmola oblysynda sý tasqynynyń aldyn alý jáne halyqtyń qaýipsizdigin qamtamasyz etý jumystaryna 5,5 mlrd teńge bóldi.
Atalǵan úsh jobany 2027 jylǵy sý tasqyny kezeńi bastalǵanǵa deıin aıaqtaý josparlanyp otyr.
Atap aıtqanda:
— Astrahan aýdanyndaǵy Qalqutan ózeniniń arnasyn tereńdetý, tazartý jáne túbin nyǵaıtý jumystaryna 4,4 mlrd teńge bólindi. Ózenniń jalpy uzyndyǵy 20,8 shaqyrym bolatyn úsh ýchaskesi tazartylyp, Eski Qalqutan jáne Qalqutan aýyldarynda eki topyraq bógeti salynady.
— 793,7 mln teńge — Shortandy aýdanyndaǵy Osnovnoe bógeniniń shlıýz-qaqpalaryn jóndeýge baǵyttaldy. Joba aıasynda tasqyn sýdy ótkizýge arnalǵan sý aǵyzý arnasy salynyp, Jolboldy ózeni arnasyndaǵy topyraq bógeti taspen nyǵaıtylady.
— Bulandy aýdanyndaǵy Ivankovskaıa bógenin rekonstrýktsııalaý jumystaryna 314,1 mln teńge qarastyrylǵan. Joba boıynsha uzyndyǵy 49 metr bolatyn sý aǵyzý qurylysy men alty sý qabyldaý kamerasy tolyq qalpyna keltiriledi. Bul qarǵyn sý aǵynyn senimdi ári dál baqylaýdy qamtamasyz etýge múmkindik beredi.
— Gıdrotehnıkalyq qurylystardy jańǵyrtý jáne ózen arnalaryn tazartý sý tasqyny qaýpin azaıtýǵa, turǵyn úıler men ınfraqurylymdy sý basýdan qorǵaýǵa, 9 myńǵa jýyq turǵynnyń qaýipsizdigin jáne kólik qatynasynyń qoljetimdiligin qamtamasyz etýge, sondaı-aq sý sapasy jaqsartyp, óńirdiń sý júıesiniń turaqtylyǵyn nyǵaıtýǵa múmkindik beredi, — delingen habarlamada.
Jalpy, óńirde bul baǵyttaǵy jumystar júıeli túrde júrgizilip keledi. 2025 jyly Aqmola oblysynyń Arshaly aýdanynda qorǵanys bógeti salynyp, 15 myńǵa jýyq turǵynnyń qaýipsizdigi qamtamasyz etildi.
Bulandy aýdanynyń Makınsk qalasynda shlıýzderi bar bóget pen beton naýalar salý ormandy-dala aımaǵynan keletin qarǵyn sýdy qaýipsiz ótkizýge múmkindik berdi.
Sondaı-aq Astrahan aýdanynda Qalqutan ózeniniń 4,7 shaqyrymdyq arnasy tazartylyp, tereńdetildi. Nátıjesinde eldi mekenderdi sý basý qaýpi joıyldy.
Osyǵan deıin elimizde qaldyqtardy qaıta óńdeýdi damytýǵa 122 mlrd teńgeden astam qarjy bólingenin jazǵanbyz.
