Aqmola oblysynda sýmen jabdyqtaý jelilerin salýǵa zańsyz aktıvter esebinen 21,5 mlrd teńge bólindi
ASTANA. KAZINFORM - Memleket basshysynyń tapsyrmasy boıynsha Qazaqstanda elge qaıtarylǵan zańsyz ıemdenilgen aktıvter qarajaty esebinen áleýmettik mańyzy bar nysandardy salý jalǵasyp jatyr. Bul týraly Úkimettiń baspasóz qyzmeti málimdedi.
Aqmola oblysynda sýmen jabdyqtaý júıesin salýǵa Arnaýly memlekettik qordan 21,5 mlrd teńge bólindi.
Búginde óńirde sýmen jabdyqtaý salasynda 28 joba júzege asyrylyp jatyr. Zerendi aýdanynda jańa sý qubyry jelilerin salýǵa jáne qoldanystaǵy sý qubyry jelilerin jańǵyrtýǵa 6 mlrd 564 mln teńge qarastyrylǵan. Jumystar Aqadyr, Jylymdy, Qanaı bı, Kókterek, Sadovoe, Troıtsk, Vasılkovskoe, Órken, Ózen jáne Barataı aýyldarynda júrgizilip jatyr.
Olardyń ishindegi eń irisi – 1 myńnan astam adam turatyn Órken kentindegi uzyndyǵy 6 shaqyrym sýmen jabdyqtaý júıesi. Jobanyń quny – 583 mln teńge.
Odan bólek, oblystyń 9 aýdanynda 2 mlrd 287 mln teńgeden astam somaǵa sýmen jabdyqtaýdyń jańa kózderin salý jáne qoldanystaǵy júıelerdi rekonstrýktsııalaý júzege asyrylyp jatyr. Nysandardy paıdalanýǵa berý osy jyldyń sońyna josparlanyp otyr.
Sandyqtaý aýdanynda toptyq sý qubyry salynyp jatyr. Joba boıynsha 22,3 shaqyrym sýmen jabdyqtaý jelilerin salý kózdelgen. Ony júzege asyrýǵa arnaýly memlekettik qordan 200 mln teńge bólindi.
Sondaı-aq Nura toptyq sý qubyryn rekonstrýktsııalaý jáne Pokrovskoe aýylynan Talapker jáne Qajymuqan aýyldaryna sý qubyryn tartý jumystary júrgizilip jatyr. Eki jobanyń jalpy quny – 9,5 mlrd teńge.
Qazir Aqmola oblysynda qalalyq eldi mekenderde sýmen jabdyqtaý qyzmeti 99%, al aýyldyq eldi mekenderde 96,6%.
Búginde elimizde qaıtarylǵan aktıvterge densaýlyq saqtaý, sport, sondaı-aq ınjenerlik jeliler men sý qurylystaryn jańartý salalaryndaǵy jobalar júzege asyrylyp jatyr.
Aıta keteıik, Jetisý oblysynda zańsyz aktıvter esebinen jańa mektep salynady.