Aqmola oblysynda sýburqaqty jóndeýge 170 mln teńge bólingen
ASTANA. KAZINFORM – Aqmola oblysynyń Atbasar aýdanynda prokýratýra bıýdjet qarajatynyń tıimsiz jumsalýyna jol bermedi.
Aýdan prokýratýrasy bıýdjet zańnamasynyń saqtalýyna júrgizgen taldaý barysynda aýdandyq Qurylys bóliminiń sýburqaqty qaıta jańǵyrtý jumystaryna 170 mln teńgeden astam somaǵa shart jasaǵanyn anyqtady.
Tekserý kezinde jobalyq-smetalyq qujattamaǵa oń qorytyndynyń eki jyldan astam ýaqyt buryn berilgeni belgili boldy. Alaıda taldaý júrgizilgen sátte atalǵan jobany iske asyrýǵa bıýdjet qarajaty bólinbegen.
Sonymen qatar merdiger uıymnyń buǵan deıin sot sheshimimen memlekettik satyp alýdyń josyqsyz qatysýshysy dep tanylǵany anyqtalǵan.
«Taldaý nátıjesinde memlekettik satyp alý rásimin ótkizý kezinde birqatar zańbuzýshylyq belgileri anyqtaldy. Atap aıtqanda, jobany qarjylandyrý máselesi tolyq sheshilmegenine qaramastan shart jasalǵan. Budan bólek, konkýrs jeńimpazy retinde anyqtalǵan merdiger uıym buryn memlekettik satyp alýdyń josyqsyz qatysýshysy dep tanylǵan. Prokýratýranyń qadaǵalaý aktisi negizinde atalǵan memlekettik satyp alý rásimi kúshin joıdy. Bul bıýdjet qarajatynyń tıimsiz jumsalýyna jol bermeýge múmkindik berdi», – dep habarlady prokýratýra.
Qadaǵalaý organy bıýdjet qarajatynyń tıimdi ári zańdy jumsalýyn qamtamasyz etý baǵytyndaǵy jumystardyń jalǵasatynyn málimdedi.
Aıta keteıik, Aqmolada 1,8 mlrd teńge turatyn orman qory memleketke qaıtaryldy.
