Aqmola oblysynda sý tasqyny saldarynan ınternetsiz qalǵan aýyl turǵyndaryna azyq-túlik jetkizildi
Kókshetaýlyq polıtsııa qyzmetkerleri, depýtattar men eriktiler búgin sý tasqyny saldarynan syrtqy álemmen baılanysy úzilgen Qyzyl Juldyz aýylyna azyq-túlik jetkizdi.
Aqmola oblystyq polıtsııa departamentiniń baspasóz qyzmeti habarlaǵandaı, 30 naýryz kúni tańǵy saǵat 5.00-de Qyzyl juldyz aýyly sý tasqyny saldarynan syrtqy álemmen baılanysyn úzdi. Munda 45 adam turady.
Oqshaýlanǵan turǵyndarǵa Kókshetaý qalalyq ІІB bastyǵynyń birinshi orynbasary, polıtsııa podpolkovnıgi Janat Sháripov, Kókshetaý qalalyq máslıhatynyń tóraǵasy Dastan Ákimov, oblystyq máslıhattyń depýtaty Omar Shonazarov baryp, kómek kórsetti.
Kelgender ózderimen birge azyq-túlik ákeldi, sonymen qatar polıtsııa medıtsınalyq kómekke óte muqtaj, esepte turǵan gıpertonııalyq naýqasty aýrýhanaǵa jetkizýge kómektesti.
Jol talǵamaıtyn kólik tizgindegen jergilikti klýb júrgizýshileri Qyzyl Juldyzǵa azyq-túlik jetkizýge kómektesti.
— Qazirgi ýaqytta polıtsııa kúsheıtilgen rejımde jumys istep jatyr. Olar kúndiz-túni muqtaj jandarǵa kómek kórsetip, oblys joldaryndaǵy jaǵdaıdy qadaǵalap otyrady, - dep tolyqtyrdy vedomstvodan.
