Aqmola oblysynda sý tasqyny bastalǵannan beri 700-ge jýyq adam evakýatsııalandy
KÓKShETAÝ. KAZINFORM - Aqmola oblysynda sý tasqyny bastalǵannan beri, 26 naýryzdan bastap barlyǵy 687 adam evakýatsııalandy. Onyń úsheýi múmkindigi shekteýli jan jáne 105-i bala.
Aqmola oblysy ishki saıasat basqarmasynyń málimetinshe, óńirdegi Esil, Jarqaıyń jáne Shortandy aýdandarynda sý tasqyny shıelenisti jaǵdaıda ótip jatyr. Atbasar, Sandyqtaý jáne Astrahan aýdandarynda Jabaı jáne Qalqutan (Kolýton) ózenderinde sýdyń aǵysy barysynda qaýip saqtalady. Ózenderdiń sý tasqyny qaýip bar 64 ýchaskesinde qosymsha muz jarý jumystary qolǵa alyndy. Oblystyń tórt aýdanynyń, onyń ishinde elorda mańyndaǵy eldi mekender qamtyldy.
Aqmola oblysy ákimdiginiń derekteri boıynsha, Kókshetaýda Qylshaqty ózeninde sýdyń deńgeıi 2 metrge deıin kóterildi. Al qaýipti deńgeıi 1,2 metr. Sol sebepti, ózen jaǵasyna jaqyn oranalasqan jeke úılerdi, kópqabatty úılerdiń aýlalaryn jáne áleýmettik nysandardy sý basty.
Aqmola oblysy TJD baspasóz qyzmetiniń málimetinshe, 26 naýryzdan bastap barlyǵy 687 adam evakýatsııalandy, onyń úsheýi múmkindigi shekteýli jan jáne 105-i bala. Onyń ishinde 526 adam úılerine oraldy, 161 adam týystarynda turyp jatyr. Sondaı-aq oblys boıynsha 18 905 jýyq mal qaýipsiz jergen shyǵaryldy.
«Sý tasqyny bastalǵannan beri barlyǵy 125 jeke úıdi sý basty, onyń ishinde Kókshetaýda 34 jeke úı, ýaqytsha turǵyn úıge arnalǵan eki ǵımarat, 188 jeke aýla aýmaǵy, 18 kópqabatty turǵyn úılerdiń aýlalary bar. Tasqyn sýdan oblys ortalyǵynda úsh áleýmettik nysan zardap shekti – «Yntymaq» balabaqshasy, temirjol aýrýhanasynyń jertóleleri, oblystyq qan ortalyǵy, saıajaı alabynyń 816 ǵımaraty, mekteptiń aýla aýmaǵy jáne jeke aýrýhana», - dedi vedomstvodan.
Sý tasqynyna qarsy sharalardy kúsheıtý úshin QR basqa óńirlerinen qosymsha kúshter men quraldar kómekke keldi. M.Ǵabdýllın atyndaǵy Azamattyq qorǵaý akademııasynyń kýrsanttary men ofıtserleri, sondaı-aq 385 volonter kómek kórsetip jatyr.
Aıta ketsek, budan buryn Atbasar aýdanynyń turǵyndaryna sýdyń kóterilýine baılanysty eskertý jarııalanǵanyn jazǵan edik.
