Aqmola oblysynda sý qoımalaryn kópfaktorly tekserý jumystary bastaldy

ASTANA. KAZINFORM - «Qazsýshardyń» Aqmola oblysyndaǵy fılıaly Krasnobor jáne Esil sý qoımalarynda, sondaı-aq Preobrajensk gıdrotorabynda kópfaktorly tekserý jumystaryn bastady, dep habarlaıdy QR Sý resýrstary jáne ırrıgatsııa mınıstrliginiń baspasóz qyzmeti.

Bul jumystarǵa geologııalyq, gıdrologııalyq jáne geodezııalyq zertteýler, sý túbi men jaǵa syzyqtaryn zerdeleý, sý ortasynyń jaǵdaıyn taldaý sııaqty keshendi sharalar kiredi.

Tekserý kezinde zamanaýı jáne sapaly qurylǵylar — georadarlar, sonarlar jáne basqa da jabdyqtar qoldanylyp jatyr.

Bıyldyń sońyna deıin Sý resýrstary jáne ırrıgatsııa mınıstrligi elimiz boıynsha 134 gıdrotehnıkalyq nysandy kópfaktorly tekserýden ótkizýdi josparlap otyr.

Aıta keteıik, byltyr Qazaqstannyń 14 oblysynda 84 nysan tekserilgen edi. Bul bastapqy jospardan da kóp boldy.

«Aqmola fılıaly bul jumystardy bıyl mamyr aıynda bastaǵan. Kópfaktorly tekserý — bul gıdrotehnıkalyq nysannyń paıdalanylý barysynda qandaı kúıde ekenin anyqtaý úshin júrgiziletin tolyq ári keshendi taldaý», – dedi «Qazsýshar» RMK Aqmola fılıalynyń dırektory Erbol Áskerbekov.

Osyǵan deıin Sý resýrstary mınıstrligi Soltústik Araldy saqtaýdyń II kezeńine kiriskeni týraly jazdyq.