Aqmola oblysynda sý ınfraqurylymyn jańǵyrtýǵa qaıtarylǵan aktıvterden 1,4 mlrd teńge bólindi
ASTANA. KAZINFORM – Aqmola oblysynda sýmen jabdyqtaý jáne sý burý júıelerin jańǵyrtýǵa Arnaýly memlekettik qordan 1,4 mlrd teńge bólindi. Qarjy Prezıdenttiń zańsyz ıemdenilgen aktıvterdi qaıtarý jáne olardy elimizdiń áleýmettik-ekonomıkalyq damýyna paıdalaný jónindegi tapsyrmasy aıasynda baǵyttaldy.
Bólingen qarajat Býrabaı aýdany men Şýchınsk qalasynda tórt ınfraqurylymdyq jobany júzege asyrýǵa jumsalady.
Atap aıtqanda, Býrabaı aýdanyndaǵy Qatarkól kóliniń mańynda ornalasqan balalardy saýyqtyrý ortalyqtarynyń sý qubyry jelileri jańǵyrtylady. Bul ınjenerlik ınfraqurylymdy jańartý kommýnaldyq qyzmetterdiń sapasyn arttyryp, maýsymdyq júkteme kezinde ortalyqtardyń turaqty jumys isteýine múmkindik beredi.
Sonymen qatar qarjynyń bir bóligi Şýchınsk qalasynyń sýmen jabdyqtaý jáne sý burý júıelerin keshendi jańartýǵa baǵyttalady. Onyń aıasynda magıstraldyq sý qubyry jelileriniń tórtinshi kezeńi salynyp, qoldanystaǵy jeliler qaıta jańǵyrtylady. Sondaı-aq sý burý nysandary jóndelip, kvartalishilik káriz jelileri tartylady.
«Jobalardy júzege asyrý jelilerdiń apattylyǵyn tómendetedi. Sonymen qatar sýdyń qajetti kólemin berý jáne aǵyndy sýlardy burý júıesine jańa turǵyn úılerdi, áleýmettik jáne týrıstik nysandardy qosýǵa múmkindik beredi, sondaı-aq óńirge ınvestıtsııa tartýǵa qolaıly jaǵdaı qalyptastyrady», – delingen Úkimet habarlamasynda.
Jobalardy iske asyrý nátıjesinde Şýchınsk qalasy men Býrabaı aýdanynyń kommýnaldyq ınfraqurylymy jańaryp, turǵyndardyń, áleýmettik mekemelerdiń jáne balalardy saýyqtyrý ortalyqtarynyń sapaly kommýnaldyq qyzmetke qoljetimdiligi artady. Sondaı-aq jańa turǵyn úı jáne áleýmettik nysandar salýǵa qajetti ınjenerlik baza qalyptasady.
2024-2026 jyldary Arnaýly memlekettik qor qarajaty esebinen jalpy quny 610 mlrd teńgeni quraıtyn 500-den astam áleýmettik jobany qarjylandyrý maquldandy. Onyń ishinde jalpy quny 226,5 mlrd teńgeni quraıtyn 267 joba sý ınfraqurylymyn damytýǵa baǵyttalǵan.
Aıta keteıik, Moıynqumda alty eldi meken qaıtarylǵan aktıvter esebinen aýyz sýmen qamtylady.
