Aqmola oblysynda Sport kúninde túrli buqaralyq is-sharalar uıymdastyryldy
KÓKShETAÝ. KAZINFORM - Kókshetaýda Qazaqstan Respýblıkasynyń Sport kúnine oraı birqatar buqaralyq jáne saltanatty is-shara ótti.
Merekelik baǵdarlama «Jańa Jaǵalaý» jaǵalaýyndaǵy tańǵy jattyǵýdan bastalyp, sporttyq sharalar uıymdastyrylyp, sala ókilderi marapattaldy.
Tańǵy jattyǵýǵa Aqmola oblysynyń ákimi Marat Ahmetjanov qatysty.
Oǵan qala turǵyndary men qonaqtary da belsendi atsalysty. Mereke aıasynda 12 shaqyrymdyq velosherý, 3 shaqyrymdyq jeńil atletıkalyq kross jáne skandınavııalyq júris uıymdastyryldy.
Sport kúnine arnalǵan negizgi saltanatty jıyn «Bolashaq saraiy» saraıynda ótti.
Munda sportshylar, jattyqtyrýshylar, sport ardagerleri, sondaı-aq dene shynyqtyrý men sport salasynyń damýyna úles qosyp júrgen mamandar marapattaldy.
Sala ókilderine Qazaqstan Respýblıkasy Týrızm jáne sport mınıstrliginiń vedomstvolyq nagradalary men oblys ákiminiń Alǵys hattary tabystaldy.
-Sport – densaýlyq kepili. Bul tek dene shynyqtyrý ǵana emes, adamnyń tolyqqandy ómiri men bolashaǵynyń kepili. Bul Qazaqstannyń myqty ári erkin adamdar eli ekenin kórsetetin úlken shara. Sondyqtan barshańyzdy Sport kúnimen quttyqtaımyn! Elimizde aldaǵy ýaqytta da tek jaqsy jańalyqtar bolsyn!- – dedi Marat Ahmetjanov.
Saltanatty shara barysynda Aqmola oblysynyń ákimdigi men «Samuryq-Qazyna» AQ arasynda ózara yntymaqtastyq týraly memorandýmǵa qol qoıyldy.
Qujat aıasynda sport ınfraqurylymyn damytýǵa baǵyttalǵan birqatar jobany júzege asyrý josparlanyp otyr. Atap aıtqanda, Qosshy qalasynda dene shynyqtyrý-saýyqtyrý keshenin salý, Kókshetaýdaǵy fýtbol stadıonyn jáne Inklıýzıvti sport ortalyǵyn jabdyqtaý kózdelgen.
Jıyn barysynda halyqaralyq jarystarǵa daıyndalyp jatqan Aqmola oblysynyń sportshylaryna da qoldaý kórsetildi. 2026 jyly XVIII jazǵy Azııa oıyndary men V Para Azııa oıyndaryna qatysý lıtsenzııasyn jeńip alǵan Aıan Beısenbaev, Arlan Janabaı, Andreı Tıýtıýn, Samıra Jýmagýlova, Adel Jeksenbınova, Orazbek Asylqulov, Batyr Tenızbaı, Alınýr Qýatuly, Davıd Degtıarev, Erkin Ǵabbasov jáne Amır Mýratbekovke aqshalaı sertıfıkattar tabystaldy.
Aqmola oblysynyń dene shynyqtyrý jáne sport basqarmasynyń basshysy Ardaq Tólendınniń aıtýynsha, óńirde sportshylardy daıarlaý men buqaralyq sportty damytýǵa basymdyq berilip keledi.
-Óńirde ár jastaǵy jáne ártúrli baǵyttaǵy sportshylardy daıarlaýǵa jaǵdaı jasalýda. Sonymen qatar sport ınfraqurylymy damyp, balalar men jasóspirimder sportyna qoldaý kórsetilýde. Bul sport salasynyń kadrlyq rezervin qalyptastyrýǵa múmkindik beredi, – dedi ol.
Sport kúni aıasynda qyrkúıek aıynda Qyrǵyz Respýblıkasynda ótetin VI Dúnıejúzilik kóshpendiler oıyndarynda Qazaqstan namysyn qorǵaıtyn ulttyq sport túrleriniń ókilderin saltanatty túrde shyǵaryp salý rásimi de uıymdastyryldy.
Merekelik sharada Qazaq ulttyq sport ýnıversıteti men Abaı Myrzahmetov atyndaǵy ýnıversıtettiń bilim granttaryna ıe bolǵan jas sportshylar da marapattaldy.
Sport kúnine arnalǵan is-sharalar Qosshy qalasynda da uıymdastyryldy. Munda sportta joǵary nátıjeler kórsetip, qala sportynyń damýyna úles qosqan sala ókilderine qurmet kórsetildi. Merekelik baǵdarlama sporttyq kórsetilimder men kontserttik qoıylymdarǵa ulasty.
Osylaısha, Sport kúni Aqmola oblysynda buqaralyq sportty nasıhattap qana qoımaı, sala mamandary men sport ardagerleriniń eńbegin atap ótýge, jas sportshylardy qoldaýǵa jáne óńirdegi sport ınfraqurylymyn damytý baǵyttaryn aıqyndaýǵa múmkindik bergen aýqymdy sharalarmen atap ótildi.
