Aqmola oblysynda sottalǵandar avtokempıngtik jabdyqtar shyǵara bastady
ASTANA. KAZINFORM - Aqmola oblysy prokýratýrasynyń úılestirýimen qylmystyq-atqarý júıesi mekemesinde avtotýrıstik jabdyqtar óndirisi iske qosyldy, dep habarlaıdy oblystyq prokýratýranyń baspasóz qyzmeti.
Baspasóz qyzmetiniń málimetterine qaraǵanda, Stepnogorsk qalasynyń prokýratýrasy qylmystyq-atqarý júıesi mekemelerinde óndiristik sektordy damytýǵa, sottalǵandardy eńbekpen qamtý deńgeıin arttyrýǵa jáne olardy áleýmettik beıimdeýge baǵyttalǵan keshendi jumystardy júıeli túrde júzege asyryp jatyr.
Osy baǵyttaǵy mańyzdy jobalardyń biri retinde №5 mekemede óndiristik angardyń qurylysy aıaqtaldy. Jańa nysannyń jalpy aýmaǵy 520 sharshy metrdi quraıdy, bul óndiristik qýattardy ulǵaıtýǵa jáne qosymsha jumys oryndaryn ashýǵa múmkindik berdi.
Prokýratýranyń úılestirýimen «Safın» JK tarapynan shamamen 30 mıllıon teńge kóleminde ınvestıtsııa tartyldy. Nátıjesinde mekeme bazasynda óndiris iske qosylyp, qazirgi tańda 30 sottalǵan eńbekpen qamtyldy.
Kásiporyn avtokempıngtik jabdyqtar shyǵarýǵa mamandanǵan. Óndiristik protsess eki aýysymda uıymdastyrylyp, kún saıyn saǵat 06:30-dan 21:00-ge deıin júzege asyrylady. Daıyn ónimdi óndirý merzimi 3-ten 7 kúnge deıingi aralyqty quraıdy, al aı saıyn 10-ǵa deıin tapsyrys oryndalady.
Atalǵan jobany iske asyrý sottalǵandardyń eńbekpen qamtylý deńgeıin arttyrýǵa, olardyń turaqty kásibı daǵdylary men óndiristik tártipti qalyptastyrýǵa oń áserin tıgizdi.
Osyǵan deıin prokýratýranyń aralasýynan keıin pedagogterge 7,2 mln teńge tólengeni týraly jazdyq.
