Aqmola oblysynda sot sheshimine qaramastan rásimdelmeı kelgen 296 múlik memleket menshigine alyndy
ASTANA. KAZINFORM – Zerendi aýdanynyń prokýratýrasy memleket menshigine ótýge tıis 200 jer ýchaskesi men 96 jyljymaıtyn múlik obektisin kommýnaldyq menshikke rásimdetkizdi. Kináli tulǵalar tártiptik jaýapkershilikke tartyldy.
Aqmola oblystyq prokýratýrasynyń málimetterinshe, Zerendi aýdanynyń prokýratýrasy múlikti kommýnaldyq menshikke ýaqtyly rásimdemeý faktilerin anyqtady. Sot sheshimderi oryndalmaı, tıisti nysandar uzaq ýaqyt boıy memleket menshigine tirkelmeı kelgen.
Atap aıtqanda, 200 jer ýchaskesi men 96 jyljymaıtyn múlik obektisi memlekettik jer qoryna ýaqtyly engizilmegen. Sonymen birge sot úkimimen tárkilengen múlikterdi tıisinshe rásimdemeý derekteri de tirkeldi.
Máselen, Aqmola oblysynyń qylmystyq ister jónindegi mamandandyrylǵan aýdanaralyq sotynyń 2024 jylǵy 8 qańtardaǵy úkimimen jeke turǵyn úı men jer ýchaskesi memleket kirisine óndirilgen edi. Alaıda bul múlik eki jyldan astam ýaqyt boıy kommýnaldyq menshikke rásimdelmeı, quqyq ıelenýshi retinde sottalǵan adamnyń ápkesi tirkelip turǵan.
Aýdan prokýratýrasynyń aralasýynan keıin atalǵan zań buzýshylyqtar tolyq joıyldy. Nátıjesinde memlekettiń 200 jer ýchaskesi men 96 jyljymaıtyn múlik obektisine quqyqtary qalpyna keltirilip, kináli tulǵalar tártiptik jaýapkershilikke tartyldy.
Osyǵan deıin Qostanaı oblysynda quny 68 mln teńge bolatyn 3 myń ga jer memleketke qaıtarylǵany týraly jazdyq.
