Aqmola oblysynda sileýsinniń kúshigi úılerdiń aýlasyna kirip ketti
ASTANA. KAZINFORM — Sileýsinniń kúshigi tym álsiz bolǵandyqtan, ony ósirý úshin ańshylyq sharýashylyqta qaldyrdy. Ol kóktemge qaraı kúsh alǵan soń tabıǵatqa jiberiledi, dep habarlaıdy QazAqparat tilshisi.
Aqmola oblysy Tótenshe jaǵdaılar departamentiniń baspasóz qyzmeti habarlaǵandaı, Sandyqtaý aýdanyndaǵy Balkashıno aýylyndaǵy úıge jabaıy sileýsin kelgen.
— Bul kútpegen jerden boldy, biz abdyrap qaldyq. Óıtkeni kishkentaı balalarymyz bar. Ol qusqa tıgen joq, tek mysyqtarmen yryldasty, — deıdi aýyl turǵyny Olga Meklenbýrg.
Oqıǵa ornyna dereý qutqarýshylar, ańshylar men polıtseıler jetti. Janýar quryqtaldy. Jabaıy ań áli bir jasqa tolmaǵan bolyp shyqty.
— Bul jerde sileýsinder óte sırek kezdesedi. Olardyń sany óte az. Bul ań agressıvti qylyq kórsetpeıdi, sondyqtan adamdarǵa qaýip tóndirmeıdi. Al bul sileýsinniń kúshigi anasyn joǵaltqan nemese taǵy bir jaǵdaı bolǵan. Biz ony biraz ýaqyt sharýashylyqta ustap, kútip-baptaımyz. Ol qatty álsiregen, sondyqtan qystan aman shyǵaryp, kóktemde tabıǵatqa jiberýimiz múmkin, — dedi Sandyqtaý oqý-óndiristik orman sharýashylyǵy dırektorynyń orynbasary Andreı Gorbanev.
Ázirge jyrtqyshtyń aýylǵa qalaı kelgeni belgisiz.
Buǵan deıin Almaty oblysynda qar barysy men sileýsin fototuzaqqa túsip qaldy.