Aqmola oblysynda segiz jańa avtokólik tıelgen avtovoz aýdaryldy

ASTANA. KAZINFORM — Kóptonnaly júk kóligi joldan shyǵyp, kıývetke aýdarylyp ketken, dep habarlaıdy Kazinform tilshisi.

Aqmola oblystyq polıtsııa departamentiniń baspasóz qyzmetiniń málimetinshe, jol-kólik oqıǵasy 2025 jylǵy 21 qarashada «Qostanaı — Áýlıekól — Surǵan» avtojolynyń 239-shaqyrymynda bolǵan.

— Aldyn ala derekter boıynsha, «Sıtrak» markaly avtovozdyń 1979 jyly týǵan júrgizýshisi Qostanaı qalasy baǵytymen júrip kele jatqan. Kólikti basyp ozý manevri kezinde ol rólge ıe bola almaı, kóptonnaly júk kóligi jol jıegine shyǵyp ketip, aýdarylǵan, — dep túsindirdi vedomstvoda.

Júrgizýshiniń Almatydan Qostanaıǵa segiz jańa qytaı avtokóligin tasymaldap bara jatqany belgili boldy. Jol apaty saldarynan zardap shekkender joq.

— Qazirgi ýaqytta tekseris júrgizilip jatyr, onyń ishinde júrgizýshiniń alkogol tutynǵan/tutynbaǵanyn anyqtaý maqsatynda mindetti saraptama taǵaıyndaldy. Barlyq qajetti sharalar aıaqtalǵan soń, protsessýaldyq sheshim qabyldanady, — dep qosty vedomstvo ókilderi.

Polıtsııa qyzmetkerleri júrgizýshilerdi, ásirese iri gabarıtti kólikti basqarǵanda, jol qozǵalysy erejelerin qatań saqtaýǵa shaqyrdy. Basyp ozbas buryn joldaǵy jaǵdaıdy jáne aýa raıyn jaqsylap qarap, qaýipsiz ekenine kóz jetkizý kerek.

Buǵan deıin Almaty oblysynda trassada jappaı jol apaty bolyp, qaza tapqandar bar ekeni habarlanǵan.