Aqmola oblysynda saılaý ýchaskeleriniń referendýmǵa daıyndyǵy qalaı
KÓKShETAÝ. KAZINFORM - Aqmola oblysynda múmkindigi shekteýli azamattardyń saılaý quqyqtaryn qamtamasyz etý – saılaý komıssııalary jumysynyń basym baǵyttarynyń biri.
Referendýmǵa daıyndyq aıasynda óńirde múgedektigi bar adamdar men daýys berý kezinde arnaıy jaǵdaıdy qajet etetin ózge de azamattar úshin saılaý ınfraqurylymynyń qoljetimdiligin qamtamasyz etýge baǵyttalǵan uıymdastyrýshylyq jáne tehnıkalyq sharalar kesheni júzege asyrylyp jatyr. Bul týraly oblystyq ishki saıasat basqarmasy habarlaıdy.
Oblystyq aýmaqtyq komıssııanyń málimetinshe, daýys berý kúni óńirde 760 referendým ýchaskesi jumys isteıdi. Onyń ishinde 700 azamattyń tirkelgen jeri boıynsha, al 60 ýaqytsha bolatyn oryndarda ashylady.
Saılaý quqyqtaryn qamtamasyz etý maqsatynda arnaıy jaǵdaıdy qajet etetin azamattar týraly málimetter naqtylanǵan.
Oblystyq referendým komıssııasynyń tóraǵasy Manarbek Sádýovtyń aıtýynsha, óńirde 2772 múgedektigi bar azamat bar. Onyń ishinde 881 adam arbamen qozǵalady, 700 adamnyń estý qabileti buzylǵan, 1191 adamnyń kórý qabiletinde qıyndyq bar. 29 adam Braıl qarpin meńgergen. Daýys berý kúni múgedektigi bar azamattar úshin ınvataksı men sýrdoaýdarmashylar qyzmet kórsetedi. Barlyq ýchaskeler osy sanattaǵy azamattardyń qajettilikterin eskere otyryp jabdyqtalǵan.
Oblys ortalyǵynda da daıyndyq jumystary tolyq kólemde júrgizilip jatyr.
Qalalyq referendým komıssııasynyń habarlaýynsha, Kókshetaý qalasyndaǵy 79 ýchaskeniń barlyǵynda saılaýshylardyń kedergisiz kirýine jaǵdaı jasalǵan.
Kókshetaý qalalyq referendým komıssııasy tóraǵasynyń orynbasary Almagúl Álenovanyń aıtýynsha, ýchaskelerde múgedektigi bar azamattarǵa arnalǵan arnaıy buryshtar jabdyqtalǵan. Onda kompıýterler, qulaqqaptar, qosymsha jaryqtandyrý jáne úlkeıtkish qurylǵylar bar. Konstıtýtsııa jobasynyń mátininiń aýdıo súıemeldeýi bar. Sondaı-aq bıýlletenderdi óz betinshe toltyrýǵa arnalǵan Braıl qarpindegi trafaretter men aýdıonusqaýlyqtar qarastyrylǵan.
Sonymen qatar mekenjaılyq jumysty tıimdi júrgizý úshin elektrondy derekter bazasy qalyptastyrylǵan. Saılaý ýchaskeleri ornalasqan nysandar Qoljetimdiliktiń ınteraktıvti kartasyna engizilýde. Qazirgi ýaqytta 79 ýchaskeniń 63-i kartaǵa engizilgen.
Oblys boıynsha respýblıkalyq referendýmǵa qatysý quqyǵyna 511 183 azamat ıe. Halyqty aqparattandyrý maqsatynda 20 call-ortalyq pen 109 biryńǵaı nómiri jumys isteıdi. Munda daýys berý orny men ýaqyty týraly aqparat alýǵa bolady.
Sondaı-aq oblys ákiminiń resmı saıtynda «Ózińdi tekser» onlaın-servısi jáne «AkmolaSaılaýBot» Telegram-boty iske qosylǵan.