Aqmola oblysynda salyq organdary sheteldik ınvestorǵa 25 mln salyq salǵan

KÓKShETAÝ. KAZINFORM - Aqmola oblysynda salyq organdary sheteldik ınvestorǵa 25 mln teńge kedendik baj, qosymsha qun salyǵy jáne ósimpul eseptegeni anyqtaldy. 

Aqmola oblysy prokýratýrasynyń baspasóz qyzmetiniń málimetinshe, baqylaý organdaryna avtomobılder men aýylsharýashylyq tehnıkalaryna arnalǵan qosalqy bólshekter shyǵarýmen aınalysatyn «Rubber Technical Items» nemis ınvestory ótinishpen júgingen.

Investor fıskaldyq organ tarapynan problemaǵa tap bolǵan. Anyqtalǵandaı, salyq organy kedendik tekserý nátıjeleri boıynsha 25 mln teńge kedendik baj, QQS jáne ósimpul eseptegen.

«Qosymsha esepteý úshin taýarlardyń shyǵý tegi týraly sertıfıkattarda keıbir derekterdiń bolmaýy negiz bolǵan. Óz kezeginde ınvestor qajetti derekter jetispeıtin taýardyń shyǵý tegi týraly sertıfıkattardyń nusqalaryn usynǵan. Osyǵan qaramastan, salyq organy olardy eskermegen. Prokýrorlyq qadaǵalaý aktisi boıynsha kedendik tekserý qorytyndylary boıynsha negizsiz qosymsha eseptelgen soma joıyldy», - dedi vedomstvodan.

Aıta ketsek, budan buryn Aqmola oblysynda salyq organdary 65 kásipkerdiń jumysyna kedergi keltirgenin jazǵan edik.