Aqmola oblysynda Respýblıka kúnine oraı kók baıraq kókke kóterildi
KÓKShETAÝ. KAZINFORM — Kókshetaýda Respýblıka kúnine oraı Memlekettik Týdy saltanatty túrde kóterý rásimi ótti. Іs-sharaǵa Aqmola oblysynyń ákimi Marat Ahmetjanov qatysty.
Qazaqstan Respýblıkasynyń Memlekettik Ánurany oryndalǵan sátte kók baıraq kókke kóterildi. Ánurandy «Jastar» vokaldyq stýdııasynyń solısteri men «Kókshetaý» mádenıet saraıynyń shyǵarmashylyq ujymdarynyń birikken hory oryndady. Memlekettik Týdy Málik Ǵabdýllın atyndaǵy Azamattyq qorǵaý akademııasynyń kýrsanttarynan quralǵan tý ustaýshylar toby alyp shyqty.
Jerlesterin ulttyq merekemen quttyqtaǵan óńir basshysy Respýblıka kúniniń el tarıhyndaǵy aıryqsha mańyzyn atap ótti. Onyń aıtýynsha, memlekettik egemendik týraly Deklaratsııa Qazaqstannyń Táýelsizdikke jetý jolyndaǵy mańyzdy tarıhı qadam boldy.
— Prezıdent Qasym-Jomart Kemeluly Toqaev Respýblıka kúnin halqymyzdyń táýelsiz memleket bolyp qalyptasýyna jol ashqan qasıetti kún dep atap ótti. Búginde Qazaqstan aýqymdy jańǵyrý kezeńinen ótýde. Onyń basty maqsaty — azamattardyń quqyqtary men bostandyqtaryn qorǵaý, zań ústemdigin nyǵaıtý jáne halyqtyń ál-aýqatyn arttyrý. Aqmola oblysy da el damýyna óz úlesin qosyp keledi: ekonomıkalyq áleýetin arttyryp, ónerkásip pen aýyl sharýashylyǵyn damytyp, ınvestıtsııa tartýda jáne jańa jumys oryndaryn ashýda. Bilim berý men medıtsınalyq qyzmet sapasyn arttyrý, ınfraqurylymdy jetildirý jáne jastarǵa jańa múmkindikter jasaý — negizgi basymdyqtarymyz. Ádiletti Qazaqstandy qurý — árqaısymyzdyń ortaq mindetimiz. Bizdiń Otanymyz bir, memleketimiz bir, halqymyz bir, — dedi Marat Ahmetjanov.
Saltanatty shara aıasynda óńirdiń damýyna, qoǵamdyq qyzmetke, áleýmettik-ekonomıkalyq jáne mádenı salalardyń órkendeýine, sondaı-aq dostyq pen yntymaqtastyqty nyǵaıtýǵa eleýli úles qosqan aqmolalyqtarǵa alǵys hattar tabystaldy.
