Aqmola oblysynda psıhıatrııalyq aýrýhanadan qashqan naýqas tabyldy

Aqmola oblysynda psıhıatrııalyq aýrýhanadan óz erkimen ketip qalǵan naýqas «Kókshetaý – Omby» tas jolynyń boıynda tabyldy, dep habarlaıdy Kazinform.

Oblystyq PD baspasóz qyzmetiniń málimetinshe, 14 jeltoqsanda Zerendi aýdandyq PB kezekshi bólimine Alekseevka kentindegi psıhıatrııalyq aýrýhanada emdelip jatqan K.Bespalyı esimdi naýqastyń qashyp ketkeni týraly habarlandy.

Joǵalǵan adamnyń densaýlyǵynyń nasharlyǵy men aýa raıynyń qubylýyna baılanysty birden izdestirý sharalary qolǵa alyndy. Alekseevka aýylynyń aýmaǵy jáne jaqyn mańdaǵy eldi mekender, avtojoldar, orman alqaptary, qaraýsyz qalǵan úıler men ǵımarattar tekserildi. Oǵan 5510 áskerı bóliminiń narıadtary, Kókshetaý qalasynyń 2-mamandandyrylǵan órt sóndirý bóliminiń 15 qyzmetkeri, qyzmettik ıtteri bar kınologtar, medıtsına qyzmetkerleri tartyldy.

Sonymen birge, tártip saqshylary joǵalǵan adamnyń buryn Jaqsy aýdany aýmaǵynda turǵanyn eskerip, sol jaqta da izdestirý sharalaryn júrgizdi.

Tórt táýlikten keıin, 18 jeltoqsanda saǵat 22.00 shamasynda joǵalǵan er adamdy «Tulpar – 506» patrýldik polıtsııasynyń ekıpajy Rýslan Baıjanov pen Nursultan Bájirov «Kókshetaý – Omby» tas jolynyń boıynda ustap, medıtsınalyq mekemege jetkizdi.

Aıta ketsek, budan buryn Aqmola oblysynda jolda qalǵan 28 sheteldik evakýatsııalanǵan edi.