Aqmola oblysynda poıyz vagondary relsten shyǵyp ketti: qozǵalys qaıta jandandy

ASTANA. KAZINFORM — Aqmola oblysyndaǵy jedel shtabtyń málimetinshe, poıyzdardyń qozǵalysy saǵat 21:18–de qaıta jandandy. Vagondardyń relsten shyǵý sebepteri tekserilip jatyr.

«Qazaqstan temir joly» UK» AQ baspasóz qyzmetiniń habarlaýynsha, 6 qarasha kúni Aqmola oblysyndaǵy Makınka stansasyna qosylatyn «Bota 2015» JShS-niń kirme jolynda 12 vagon relsten taıyp ketip, keıin onyń segizi trassadan shyǵyp ketken. 

— Jumystarǵa qatysqan lokomotıv jeke kompanııaǵa tıesili. Lokomotıv brıgadasy da sol jeke uıymnyń qyzmetkerleri, — dep naqtylady vedomstvo ókilderi.

Oqıǵa saldarynan baılanys jelisiniń qurylǵylary zaqymdanǵan. Vedomstvonyń málimetinshe, zardap shekkender joq, biraq poıyzdardyń qozǵalysy biraz ýaqytqa keshikken.

— QTJ-nyń apattyq brıgadalary men qalpyna keltirý poıyzynyń arqasynda Makınka stansasynda vagondar qalpyna keltirilip, baılanys jelisine kerneý berildi. Poıyz qozǵalysy qaıta ashyldy. Oqıǵa jeke uıym qyzmetkerleriniń kinásinen bolǵan. Vagondardyń relsten shyǵý sebepteri anyqtalyp jatyr, — delingen habarlamada.

Oblys ákimdigi naqtylaǵandaı, relsten shyqqan vagondarda aýdannyń bir seriktestigine tıesili raps maıy tıelgen. 

Aıta ketelik Oljas Bektenov temir jol jobalaryn ýaqytyly paıdalanýǵa berýdi tapsyrǵan edi.