Aqmola oblysynda poıyz qaǵyp ketken er adam qaza tapty
ASTANA. KAZINFORM – Aqmola oblysynda poıyz qaǵyp ketken er adam kóz jumdy. Oqıǵaǵa baılanysty qylmystyq is qozǵaldy.
Qaıǵyly jaǵdaı Shortandy aýdanynda bolǵan. Poıyz der kezinde toqtap úlgermeı, temirjol ústinde bolǵan er adamdy qaǵyp ketken. Ol alǵan jaraqatynan kóz jumǵan.
Kólik polıtsııasy departamentiniń málimetinshe, 19 qarashada Astana stantsııasyndaǵy kólik polıtsııasy basqarmasy qylmystyq is qozǵaǵan. Іs temirjol kóliginiń qozǵalysy nemese ony paıdalaný qaýipsizdigi erejelerin buzý saldarynan abaısyzda adam ólimine ákep soǵý deregi boıynsha qozǵalǵan.
– Qazir qajetti tergeý amaldary júrgizilip, oqıǵanyń sebepteri men mán-jaıy anyqtalyp jatyr. QR Qylmystyq-protsestik kodeksiniń 201-babyna sáıkes ózge aqparat jarııa etilmeıdi, – dep túsindirdi vedomstvo ókilderi.
Polıtsııa turǵyndarǵa temirjoldaǵy qaýipsizdik erejelerin eske saldy.
– Temirjoldan tek arnaıy belgilengen jerlerden ótińizder. Poıyzdyń dybystyq belgisin estý úshin temirjol mańynda qulaqqapty sheship, baskıimniń kúláparasyn túsirińizder. Poıyz ótip bara jatqanda platformanyń shetinde turmańyzdar. Vagondardyń tóbesine shyqpańyzdar. Joǵary kerneýli elektr togy adam ómirine asa qaýipti, – dep eskertti polıtsııa ókilderi.
Eske salaıyq, buǵan deıin Ekibastuzda temirjol stansasynyń jumysshysy vagon astynda qalyp, qaza tapqany habarlanǵan edi.