Aqmola oblysynda 11 jylqyny poıyz qaǵyp ketti
KÓKShETAÝ. KAZINFORM — 11 naýryz kúni tańerteń Aqmola oblysyndaǵy Torǵaı – Sileti aralyǵynda temirjol boıynsha jol apaty boldy. Ereımentaý – Altyntaý baǵytymen kele jatqan júk poıyzynyń mashınısi temirjolda júrgen jylqylardy kórip, poıyzdy shuǵyl tejeýge májbúr boldy. Bul týraly Polisia.kz jazdy.
Ókinishke qaraı, apattyń aldyn alý múmkin bolmaı, poıyz 11 jylqyny qaǵyp ketti. Poıyz 23 mınýt kidirýge májbúr boldy. Jedel-izdestirý is-sharalary barysynda kólik polıtseıleri Aqmola oblysyndaǵy sharýa qojalyqtarynyń biriniń 35 jastaǵy mal baǵýshysyn anyqtady.
— Er adam temirjoldardyń bólingen jolaǵynda mal jaıý qaǵıdalaryn buzǵany úshin jaýapkershilikke tartyldy. Shuǵyl tejeý jolaýshylar men poıyz brıgadalary músheleriniń ómiri men densaýlyǵyna orny tolmas zııan keltirip, temir jol kóligi qozǵalysynyń qaýipsizdigine qater tóndirýi múmkin. Osyǵan baılanysty kólik polıtseıleri úı janýarlary ıeleriniń temirjoldyń bólingen jolaǵynda mal jaıýǵa jol bermeýi jáne olardy qaraýsyz qaldyrmaýy tıis ekenin taǵy da eskertedi, — delingen habarlamada.
ІІM baspasóz qyzmetiniń málimetinshe, jyl basynan beri kóliktegi polıtsııa departamentinde poıyzdy shuǵyl tejeýdiń 234 faktisi tirkelgen, onyń ishinde 61-i temirjol boıynda adamdardyń, 167-si úı janýarlarynyń bolýymen baılanysty jáne basqa da sebepter bar.
Aıta keteıik, byltyr 44 adamdy poıyz basyp ketse, sonyń 27-i kóz jumdy.
