Aqmola oblysynda polıtsııa qardyń qalyń túsýine baılanysty júrgizýshilerge eskertý jasady
ASTANA. KAZINFORM - 1-3 aqpan aralyǵynda Aqmola oblysyna qalyń qar túsedi degen boljam bar. Bul jol jaǵdaıyn edáýir qıyndatýy múmkin. Osyǵan baılanysty polıtseıler júrgizýshilerdi barynsha saq bolýǵa shaqyryp otyr.
Polisia.kz saıty qar qalyń túsken kezde qozǵalystyń shekti jyldamdyǵy 140 km/saǵ-tan 60 km/saǵ-qa deıin tómendetý kerektigin eske saldy.
Aımaq trassalarynda qaýipsizdikti qamtamasyz etý úshin patrýldik polıtsııanyń 300-den astam qyzmetkeri jáne jol-tehnıkalyq ınspektsııanyń 21 qyzmetkeri jumyldyryldy. Olar joldardaǵy jaǵdaıdy baqylaıdy, jol qyzmetterin úılestiredi jáne joldardyń ýaqytyly tazalanýyn qadaǵalaıdy.
— Qar jaýǵan kezde joldyń kórinýi qıyndaıdy. Biz júrgizýshilerdi muqııat bolýǵa, jyldamdyq rejımin saqtaýǵa jáne múmkindiginshe alys saparlardan aýlaq bolýǵa shaqyramyz, — dep atap ótti Aqmola oblystyq Polıtsııa departamenti Jol polıtsııasy basqarmasynyń bastyǵy Aslan Qyzbıkenov.
Júrgizýshilerge qazirgi jol jaǵdaıy men yqtımal qozǵalys shekteýleri týraly habardar bolý úshin qutqarý qyzmetteri men polıtsııanyń jedel habarlamalaryn baqylaý usynylady.
Osyǵan deıin Astana men elimizdiń 15 oblysynda aýa raıyna baılanysty eskertý jarııalanǵanyn jazdyq.