Aqmola oblysynda paıdalanylmaı jatqan 22 myń gektar jer memleketke qaıtaryldy
ASTANA. KAZINFORM — Aqmola oblysynda prokýrorlardyń aralasýymen 22 myń gektardan astam paıdalanylmaı jatqan aýyl sharýashylyǵy jeri memleket menshigine qaıtaryldy.
Oblys prokýratýrasynyń málimetinshe, óńirde jaıylymdyq jer men egistik alqaptarynyń tapshylyǵy ózekti máselelerdiń biri bolyp otyr. Osyǵan baılanysty prokýrorlar jer telimderin zańsyz ıelený men maqsatsyz paıdalanýǵa qatysty júıeli túrde sharalar qabyldaýda.
Atap aıtqanda, qazirgi tańda Birjan sal aýdanynyń prokýratýrasy «Jaıylymdyq jerlerdi ulǵaıtý» jobasyn iske asyryp jatyr. Joba aıasynda aýdandaǵy birqatar jer paıdalanýshylardyń aýyl sharýashylyǵy alqaptaryn uzaq ýaqyt boıy Jer kodeksiniń talaptaryna sáıkes paıdalanbaı kelgeni anyqtalǵan.
Jol berilgen zańbuzýshylyqtardy joıý maqsatynda Birjan sal aýdanynyń prokýratýrasy engizgen qadaǵalaý aktisi nátıjesinde kadastrlyq quny 323 mıllıon teńge bolatyn 22 myń gektardan astam egistik jer memleket menshigine qaıtaryldy.
«Qaıtarylǵan jerlerdi adal jergilikti turǵyndar men kásipkerlerdiń paıdalanýyna berý kózdelip otyr. Bul aýyl sharýashylyǵy óndirisin ulǵaıtýǵa jáne jer resýrstaryn tıimdi basqarýǵa múmkindik beredi», – dep atap ótti oblystyq prokýratýra ókilderi.
Prokýratýra atap ótkenindeı, bul baǵyttaǵy jumystar jalǵasyp jatyr. Sonymen qatar jer paıdalanýshylardyń paıdalanylmaı jatqan jer telimderin óz erkimen qaıtarýyna basa nazar aýdarylýda.
Aıta keteıik, quny 54 mıllıard teńge bolatyn taýly aımaqtaǵy jerler memleket menshigine qaıtaryldy.