Aqmola oblysynda páter, jedel járdem kóligi jáne mektep avtobýstary tabystaldy
ASTANA. KAZINFORM - Kókshetaýda qalasynyń Táýelsizdik alańynda Konstıtýtsııa kúnine arnalǵan merekelik is-shara ótti. Saltanatty sharada sóz sóılegen Aqmola oblysynyń ákimi Marat Ahmetjanov Qazaqstan Respýblıkasynyń Konstıtýtsııasy – elimizdiń árbir azamatynyń quqyqtary men bostandyqtarynyń negizi, qoǵamnyń turaqtylyǵy men demokratııalyq damýynyń kepili ekenin aıtty.
«Konstıtýtsııa kúni merekesiniń qazaqstandyqtar úshin jyldan jylǵa mańyzy artyp keledi. Elimizde bolyp jatqan oń ózgeristerge barlyǵyńyz kýá bolyp otyrsyzdar. Bul jetistikterdiń barlyǵyna Konstıtýtsııanyń negizgi normalary men prıntsıpteri arqyly qol jetkizildi. Biz el men óńirdi damytýǵa baǵyttalǵan mańyzdy mindetterdi odan ári sheshe alatynymyzǵa senimdimiz», - dep atap ótti oblys ákimi.
Mereke aıasynda, jetim jáne ata-anasynyń qamqorlyǵynsyz qalǵan balalar, kóp balaly otbasylar jáne halyqtyń áleýmettik osal toptaryndaǵy 22 otbasyǵa jańa páterdiń kilti tabystaldy.
Baspanaly bolǵandardyń arasynda 17 jyl páter kezeginde turǵan Dınara Omarova da bar.
«Osy qýanyshty kúni Memleket basshysyna kórsetken kómegi úshin shyn júrekten alǵys aıtqym keledi. Meniń otbasym 17 jyl kezekte turdy. Endi bizdiń armanymyz oryndaldy, bizdiń óz baspanamyz bar, jarqyn jáne jaıly», - dep bólisti óz qýanyshymen Dınara Omarova.
Sondaı-aq, osyndaı aıtýly kúni oblys ákimi 24 medıtsınalyq jedel járdem kóligi men 5 mektep avtobýsynyń kiltin tabystady.
«Jańa jedel járdem kólikteri tek tehnıka emes. Bul bizdiń azamattarymyzdyń densaýlyǵy men ál-aýqatyna qosqan úlesi. Bul avtomobılder árbir aqmolalyqqa ýaqytyly medıtsınalyq kómek kórsetýdi qamtamasyz ete otyryp, halyqtyń ıgiligine qyzmet etetin bolady» – dep atap ótti M.Ahmetjanov.
Saltanatty is-shara aıasynda oblystyń damýyna úles qosqan bir top aqmolalyq «Qurmet» jáne «Eńbek Dańqy» ordenderimen, «Eren eńbegi úshin» medaldarymen marapattaldy.
Aıta keteıik, Ata zańymyzdyń 29 jyldyǵynda oblys ortalyǵyndaǵy Saryarqa shaǵynaýdanynda erekshe balalarǵa arnalǵan balabaqsha paıdalanýǵa berildi.
Sonymen qatar, Býrabaı aýdanynyń Býrabaı kentinde qosalqy stantsııa, Zelenyı bor aýylyndaǵy Mádenıet úıi jáne sport kesheni de el ıgiligine berildi. Atbasar aýdanyndaǵy «BAXA SӦHNE» JShS suly jarmasyn óndirý fabrıkasy iske qosyldy.
Aıta ketsek, budan buryn Aqmola oblysynda mal dárigerlerine sý jańa 19 avtokóliktiń kilti tabys etilgenin jazǵan edik.
