Aqmola oblysynda «Palaý ortalyǵy» kafesiniń ıesi ustaldy
ASTANA.KAZINFORM - Qylmystyq isti tergeý barysy QR Bas prokýratýrasynyń baqylaýyna alyndy, dep habarlaıdy Kazinform agenttiginiń tilshisi.
Aqmola oblystyq prokýratýrasynyń málimetinshe, Şýchınsk qalasyndaǵy «Palaý ortalyǵy» kafesinde bolǵan órtke baılanysty Qylmystyq kodekstiń 292-babynyń 3-bóligi – «Abaısyzda eki nemese odan da kóp adamnyń ólimine ákep soqqan órt qaýipsizdigi talaptaryn buzý» boıynsha qylmystyq is qozǵaldy.
- Qylmystyq isti arnaıy prokýrorlar tergep jatyr. 2026 jyldyń 2 naýryzynda «Palaý ortalyǵy» kafesiniń ıesi Qylmystyq is júrgizý kodeksiniń 128-baby boıynsha ustaldy. Qajetti tergeý áreketteri júrgizilip jatyr, - dep qosty vedomstvo.
Tergeýdi Bas prokýratýra óz baqylaýyna aldy. Qylmystyq is júrgizý kodeksiniń 201-babynyń 1-bóligine sáıkes basqa aqparat qupııa bolyp tabylady.
Esterińizge sala keteıik, buǵan deıin Şýchınskidegi kafede gaz jarylysynan alty adam qaza tapqany týraly habarlanǵan bolatyn.
Keıinirek qaza tapqandar sany jetige jetti.
Artynsha bes naýqastyń Astanaǵa aýystyrylǵany týraly habarlandy.
Qazirgi ýaqytta tórt naýqas Avıtsenna-Býrabaı aýrýhanasynyń jansaqtaý bóliminde, al taǵy tórt naýqas Aqmola oblystyq kópsalaly aýrýhanasynyń jansaqtaý bóliminde jatyr. Dárigerler áleýmettik jelilerde taraǵan Şýchınskidegi «Palaý ortalyǵy» kafesindegi órtten zardap shekkenderge shuǵyl túrde qan qajet ekendigi týraly aqparatty joqqa shyǵardy.