Aqmola oblysynda óz otbasynyń tórt múshesin óltirgen er adam májbúrli emdeýge jiberildi
ASTANA.KAZINFORM - Qylmysy dáleldengenin anyqtaǵan sot otbasynyń tórt múshesin qatygezdikpen óltirgen er adamdy psıhıatrııalyq aýrýhanada májbúrli emdeýge jiberdi.
Aqmola oblystyq sotynyń habarlaýynsha, mamandandyrylǵan aýdanaralyq qylmystyq sot Arshaly aýdanynyń turǵyny mamandandyrylǵan psıhıatrııalyq aýrýhanada májbúrli emdeýge jatqyzylýy kerek degen qorytyndyǵa keldi.
Er adamnyń buryn sotty bolǵany anyqtaldy. 2016 jyly oǵan bas bostandyǵyn shekteý jáne qoǵamdyq jumystarǵa tartý jazasy taǵaıyndaldy. 2022 jyly ol psıhıatrııalyq aýrýhanada májbúrli emdeýge jatqyzylǵan. 2023 jyldan bastap ol paranoıdtyq shızofrenııa dıagnozymen psıhıatrdyń baqylaýyna alynǵan. Qazirgi ýaqytta er adam Almaty oblysynyń Talǵar aýdanynda ornalasqan Respýblıkalyq psıhıatrııalyq aýrýhanada emdelip jatyr.
2026 jyldyń naýryz aıynda anasynyń úıinde uıaly telefonynyń isten shyǵýyna baılanysty jıenimen janjaldasyp qalǵan. Jıeni «102» nómirine qońyraý shalyp, polıtsııaǵa habarlaǵan. Polıtsııa kelgende anasy turmystyq janjal sheshilgenin aıtyp, olardyń kómeginiń qajet emes ekenin túsindirip, keri qaıtarǵan.
Polıtsııa ketkennen keıin, er adam quqyq qorǵaý organdaryna qońyraý shalynǵanyna agressııa kórsetip, úıdegi birneshe adamǵa as úı pyshaǵymen soqqy bergen.
Nátıjesinde anasy, jıeni jáne eki qart qonaq oqıǵa ornynda qaıtys boldy. Qaıtys bolǵan tórt adamnyń úsheýi zeınetkerler.
Sot-psıhıatrııalyq saraptamanyń qorytyndysy boıynsha, er adam sozylmaly psıhıkalyq buzylyspen - paranoıdtyq shızofrenııamen aýyrady. Áleýmettik qaýipti áreket jasalǵan kezde ol sozylmaly psıhıkalyq buzylýmen aýyrǵan jáne óz áreketteriniń naqty sıpaty men áleýmettik qaýiptiligin túsine almaǵan. Sarapshylar sonymen qatar ol tergeý men sotqa qatysýǵa qabiletsiz degen qorytyndyǵa keldi.
— Sot sheshimimen G. Qazaqstan Respýblıkasy Qylmystyq kodeksiniń 99-babynyń 2-bóliginiń 1 jáne 5-tarmaqtarynda kózdelgendeı, esi durys emes kúıinde áleýmettik qaýipti áreket jasaǵany úshin qylmystyq jaýapkershilikten bosatyldy. Sottyń baspasóz qyzmeti habarlaǵandaı, oǵan mamandandyrylǵan psıhıatrııalyq aýrýhanada qarqyndy baqylaýmen májbúrli emdeý taǵaıyndaldy.
Sot sheshimi áli zańdy kúshine engen joq, - dep habarlady sottyń baspasóz qyzmeti.
Buǵan deıin polıtsııa 4 týysyn óltirdi dep kúdikke ilingen aqmolalyqtyń izin sýytpaı ustaǵanyn habarlaǵan edik.
Keıinirek kúdikti er adamǵa reaktıvti psıhoz dıagnozy qoıylǵany habarlandy.
