Aqmola oblysynda ondaǵan qoǵamdyq tamaqtaný orny lıtsenzııasyz jumys isteıdi

ASTANA. KAZINFORM - Aqmola oblysynda epıdemıologııalyq mańyzy joǵary 259 qoǵamdyq tamaqtandyrý nysanynyń 66-sy ruqsatsyz jumys isteıdi.

Mundaı tamaqtandyrý oryndarynyń kóbi Kókshetaý qalasynda – 20, Býrabaı – 14, Tselınograd – 8, Shortandy – 7, Bulandy – 6 jáne Qosshy qalasynda – 5. Bul týraly Aqmola oblysynyń bas memlekettik sanıtarlyq dárigeri Aınagúl Mýsına habarlady.

- Tekserý barysynda anyqtalǵan buzýshylyqtar boıynsha QR Kásipkerlik kodeksiniń 136-babyna sáıkes jedel den qoıý sharalarynyń mynadaı túrleri qoldanylady: qyzmetke nemese onyń jekelegen túrlerine tyıym salý, qyzmetti nemese onyń jekelegen túrlerin toqtata turý, alyp qoıý jáne keri qaıtaryp alý. Kásipkerlik sýbektileri adamdar úshin ónimderdiń, jumystar men qyzmetterdiń qaýipsizdigi men zııansyzdyǵyn qamtamasyz etý úshin obektide talaptardyń saqtalýyna ózin-ózi baqylaýdy uıymdastyryp, júrgizýi tıis, - dep atap ótti Aınagúl Mýsına.

Óndiristik baqylaý onyń baǵdarlamasyn ázirleýdi jáne zerthanalyq zertteýler men ólsheýlerdi júzege asyrýdy, sondaı-aq qyzmetkerlerdiń medıtsınalyq tekserýlerden ýaqytyly jáne tolyq ótýin, ónimniń qaýipsizdigi men sáıkestigin rastaıtyn qujattardyń bolýyn baqylaýdy jáne t.b. qamtıdy. Alty aıda bir ret sýbektiler óndiristik baqylaý týraly esepti aýmaqtyq memlekettik sanıtarlyq-epıdemıologııalyq baqylaý basqarmalaryna usynýy kerek.

873 qoǵamdyq tamaqtandyrý ornynyń 475-inde ǵana óndiristik baqylaý uıymdastyrylǵan. Birinshi jartyjyldyqtyń qorytyndysy boıynsha jumys istep turǵan 259 qoǵamdyq tamaqtandyrý nysanynyń 96-sy ǵana (38,2%) óndiristik baqylaý boıynsha esep berdi.

Buǵan deıin Aqmola oblysynda 55 kólikti zańsyz rásimdegender sottalǵanyn jazǵan bolatynbyz.