Aqmola oblysynda oqýlyqtardy jańartýǵa qarjy jetispeıdi
ASTANA. KAZINFORM — Aqmola oblysynyń ekonomıka jáne bıýdjettik josparlaý basqarmasy bul másele ishki rezervter esebinen sheshiletinin naqtylady, dep habarlaıdy Kazinform agenttiginiń tilshisi.
Másele Aqmola oblystyq máslıhatynyń áleýmettik máseleler jónindegi kezekti komıssııa otyrysynda kóterildi.
Aqmola oblysy bilim basqarmasy basshysynyń orynbasary Valerıı Gamazovtyń aıtýynsha, Oqý-aǵartý mınıstrliginiń josparyna sáıkes, aldaǵy jyly 3–4, 7, 8 jáne 9-synyptarǵa arnalǵan oqýlyqtardy aýqymdy jańartý josparlanyp otyr.
3–4-synyp oqýshylary úshin eki tildegi oqytý boıynsha jeti pánniń oqýlyqtary jańartylady. 7-synypta tek dúnıejúzi tarıhy pániniń oqýlyǵy jańartylady. Eń úlken ózgerister 8-synypqa qatysty bolady: oqý baǵdarlamalarynyń qaıta qaralýyna baılanysty 13 pánniń oqýlyqtary jańartylady. Al 9-synypta 10 pán boıynsha oqýlyqtar jańarady.
— Sonymen qatar oqýlyqtardy jańartý eleýli qarjylyq máselemen baılanysty. Jalpy qajettilik 3 mlrd 73 mln teńgeni qurasa, oblystyq bıýdjette nebári 1 mlrd 255,4 mln teńge ǵana qarastyrylǵan. Tapshylyq kólemi — 1 mlrd 818,2 mln teńge. Oblystyq nemese respýblıkalyq bıýdjetten qosymsha qarajat bólý máselesi shuǵyl qaraýdy qajet etedi jáne tıisti bıýdjettik ótinim berildi, — dedi spıker.
Qarajat tapshylyǵy bıýdjettiń mektep ádebıetterin aýqymdy jańartý qajettiligi jarııalanǵanǵa deıin bekitilgenimen baılanysty.
Otyrysqa qatysqan óńirdiń ekonomıka jáne bıýdjettik josparlaý basqarmasynyń ókilderi bul másele ishki rezervter esebinen sheshiletinin túsindirdi. Sondyqtan jańa oqý jylyna deıin másele tolyq sheshimin tabady.
Eske salaıyq, buǵan deıin Qazaqstanda kórý qabileti buzylǵan balalardy oqýlyqpen qamtýǵa 879 mln teńge bólineti týraly jazǵan bolatynbyz.
