Aqmola oblysynda oqý jyly bastalysymen adam papıllomavırýsyna qarsy vaktsınatsııa qolǵa alynady
KÓKShETAÝ. KAZINFORM - Aqmola oblysynda oqý jyly bastalysymen adam papıllomavırýsyna qarsy vaktsınatsııa qolǵa alynady.
Aqmola oblysy Canıtarlyq-epıdemıologııalyq baqylaý departamenti baspasóz qyzmetiniń málimetinshe, bastapqyda 11 jastaǵy 175 myńnan astam qyzdy qamtý josparlanǵan. Kámeletke tolmaǵandardy vaktsınatsııalaý ata-anasynyń nemese basqa zańdy ókilderiniń jazbasha kelisiminen keıin júzege asyrylady.
Adam papıllomavırýsyna qarsy vaktsına 0,5 ml standartty mólsherde ıyq bulshyqetine engiziledi. Vaktsınanyń keri áseri bolmaǵan jaǵdaıda dárigerdiń qaraýynan keıin 6 aıdan soń ekinshi ret salynady. Qazaqstanda adam papıllomavırýsyna qarsy 4 valentti vaktsına qoldaný josparlanýda, ol 4 tıpti HPV – 6, 11, 16 jáne 18-den qorǵaıdy.
Álemde bul vaktsınaǵa suranys óte joǵary. Búgingi tańda álemniń 125-ten astam eli ulttyq vaktsınatsııa kúntizbesine osy vaktsınatsııany engizdi. Ózbekstan, Qyrǵyzstan jáne Túrikmenstan tárizdi Ortalyq Azııadaǵy kórshilerimiz adam papıllomavırýsyna qarsy vaktsına engizdi.
Aqmola oblysy sanıtarlyq-epıdemıologııalyq baqylaý departamenti basshysynyń mindetin atqarýshy Serik Omarhanovtyń aıtýynsha, Qazaqstanda jatyr moıny obyry áıelder arasyndaǵy onkologııalyq aýrýlar statıstıkasy boıynsha sút bezi obyrynan keıin ekinshi orynda tur.
Ótken jyly Aqmola oblysynda jatyr moıny obyrynyń 109 jaǵdaıy tirkeldi, 2022 jyly 87 jaǵdaı, 2024 jyldyń 7 aıynda 50 naýqas áıel anyqtaldy. Jatyr moıny obyrynan bolatyn ólim-jitim de óte joǵary, máselen, 2022 jyly 33 áıel osy aýrýdan qaıtys bolsa, 2023 jyly bul kórsetkish 36 adam boldy.
«Jyl saıyn Qazaqstanda jatyr moıny obyrynyń 1700-ge jýyq jańa jaǵdaıy jáne osy aýrýdan 600-ge jýyq ólim-jitim tirkeledi. Aýrý uzaq ýaqyt boıy ınvazıvti emes kezeńmen baıaý jáne negizinen jergilikti ósýmen sıpattalady, ıaǵnı ony erte anyqtaý tek turaqty skrınıngter arqyly múmkin bolady. Adam papıllomavırýsyna qarsy vaktsına qazaqstandyq áıelderdi jatyr moıny obyry men basqa da onkologııalyq aýrýlardyń damýynan qorǵaýdyń zamanaýı jáne barynsha tıimdi (tıimdiliktiń 95%-ǵa jýyǵy) tásili», - dep túsindirdi Serik Omarhanov.
Aıta ketsek, budan buryn Aqmola oblysynda 4 adamnyń brýtsellez juqtyrǵany anyqtalǵanyn jazǵan edik.
