Aqmola oblysynda naızaǵaı saldarynan qurǵaq shóptiń órtenýi jıiledi
ASTANA. KAZINFORM — Aqmola oblysynda keshe qutqarýshylar óńirdiń ártúrli aýdandarynda naızaǵaıdyń saldarynan shyqqan tórt órtti sóndirse, búgin taǵy eki órttiń oshaǵyn joıdy, dep habarlaıdy Kazinform agenttiginiń tilshisi.
Aqmola oblysynda tabıǵı órtter áli de tirkelip jatyr.
Óńirlik Tótenshe jaǵdaılar departamentiniń resmı ókili Ersaıyn Qoıshybaevtyń aıtýynsha, 19 shilde kúni Ereımentaý, Esil, Aqkól jáne Qorǵaljyn aýdandarynda qurǵaq shópten tutanǵan tórt órt sóndirildi.
— Órttiń jalpy aýmaǵy 37 gektardy qurady. Oqıǵa oryndaryna Aqmola oblysy TJD-nyń kúshteri men quraldary, jergilikti atqarýshy organdar, erikti órt sóndirý jasaqtary, sondaı-aq «Aýyl qutqarýshylary» órt sóndirý beketteriniń qyzmetkerleri jumyldyryldy. Barlyq órt jedel túrde sóndirildi. Eldi mekenderge qaýip tóngen joq, — dedi spıker.
Ersaıyn Qoıshybaevtyń sózinshe, órtterdiń shyǵýyna tabıǵı qubylys — naızaǵaı razrıadtary sebep bolǵan.
Búgin Tselınograd jáne Atbasar aýdandarynda taǵy eki órt sóndirildi. Órttiń jalpy aýmaǵy 2,5 gektardy qurady. Oqıǵa oryndarynda oblystyq TJD, jergilikti atqarýshy organdar jáne jergilikti astyq qabyldaý kásipornynyń (HPP) kúshteri men quraldary jumys istedi.
— Jalpy ótken aptada óńirde qurǵaq shóptiń birneshe iri órtený deregi tirkeldi. Olardyń barlyǵy tolyqtaı sóndirildi. Eshbir turǵyn úıge zaqym kelgen joq. Bul jaǵdaı Aqmola oblysynda órt qaýpiniń tórtinshi klasy jarııalanýyna, uzaq ýaqyt boıy ystyq ári qurǵaq aýa raıynyń saqtalýyna jáne naızaǵaı razrıadtarynyń jıi túsýine baılanysty bolyp otyr. Sonyń saldarynan qurǵaq shóp tutanyp jatyr, — dep tolyqtyrdy Ersaıyn Qoıshybaev.
Qutqarýshylar oblys turǵyndary men qonaqtaryn turmysta da, tabıǵat aıasynda da órt qaýipsizdigi talaptaryn qatań saqtaýǵa shaqyrdy.
Eske salaıyq, buǵan deıin «Semeı ormany» memlekettik orman tabıǵı rezervaty aýmaǵynda 16 shildede bastalǵan úlken orman órti 18 shilde saǵat 9:45-te oqshaýlanǵany habarlanǵan bolatyn.
